Obrein Simasiku

ONANDHI-Aakwanezimo yomulumentu ngoka a lopotwa miikundaneki oshiwike sha ziko a fumvika omonamati nomwenyo momukunda gwedhina Onandhi moshikandjohogololo shaShikoto eta si onkee ngaa natango yena omitima dha lindimana noya haluthwa keso ndyoka. Aakwanezimo mboka ya  hokolola na ku longa oshilonga shoka onga omuntu a mwena ina ulika nale omayinyengo gwomuntu ena ongeyo.
Oshiningwanima shika osha hokololwa sha holoka molyomakaya gehulilo shiwike lya ziko sha holokele momukunda gwedhina Onandhi moshikandjohogololo shOnankali moshitopolwa omo tuu moka.
Okwa hokololwa kutya nakuvala okanona hoka okwayi megumbo moka eta kutha okanona hoka oye He yako ete ka tu la moshako ndele teka fala mombila ndjoka a fula mepya ete ka filile mo sigo ka si .
Omufekelwa ngoka a holoka mompangu yamangestalata mOndangwa metitano okwali a tseyika kedhina onga Nicolau Peyohamba Nghuumbwavali, na  tindilwa omboloha.
Omulombo ngoka guli mepeko lyopolisi ogwa hokolola kutya ngashingeyi okanona hoka oka etwa kaandjawo ya He molyomakaya ogwo tuu ngoka ku yina opo ka kale nayinakulu ngoka a vala He opo eka tekule oshoka yina otayi koSwakopmund hoka taka konga iilonga.
Okwa hokololwa kutya nonande okwa holoka metitano ka pe na nande omukwanezimo gumwe a holoka oshoka oyali taya longekidha omalongekidho gefumviko. Na okwali kwa ziminwa kutya okanona hoka otaka ka fumvikwa koshitopolwa shaMusati hoka kwaza yina mule woshiwike shika.
“Ka tushi naanaa shoka sha etitha opo nguka a ninge oshinimgwanima shika , oshoka okwali omuntu a mwena noonkondo ngoka I ha u mana nomuntu, ye woo iha nu omalovu nenge omapangwe. Oshili sho she ne tse otwa kumwa noonkondo,” osho yinakulu ya nakusa a hokolola ngaaka.
Okwa hokololwa kutya omanga oshiningwanima inashi ningwa nguka okwali a tumu uunona weye mepya wu ka lime , unene tuu mpoka a fulu ombila yomona.
Na konima aniwa nguka okwa lombwele uunona uukwawo kutya ye ota fala okanona hoka kuyina emutegelela kopate.
“sho nda galukile megumbo onda pula omutamanekwa kutya omutekulu gwange oku li peni na okwali a ya mukulange kutya  okwiilwa po kuyina na kandali ndina omalimbililo ogendji,” osho yinakulu a tsikile ko ngaaka.
Yinakulu okwa tsikile ko tati ye  okwa ka uva ashike oshili ongula ya landula ko sho mwayinakadhona a lombwelenge kutya Nghuumbwavali, ota lili ashike ye ita popi tati ashike okwiipa uusama kwaashoka a ninga.