OSHAKATI - Aalandithi mboka haya landithile mepandaanda enene lya thinda kOkatana popepi noGame Complex oye li ya kenyanana Muni gwaShakati konima sho ya li ya tidhwa pehala lyawo lyomalandithilo konyala iiwike iyali ya piti.
Pethimbo ya li moonkundathana naKundana aalandithi oya li ya holola kutya ookastoma dhawo odhindji aantu mboka haya zi komikunda haya longitha oshitawuwa oshinene sha za poGame sha thinda kOkatana nomikunda dhi li konima yokatana ngaashi Endola.

Suama Mutota omunamimvo 29 okwa ti oya li haya landithile pehala mpoka hapu kwatelwa oolefa kaanamukunda dha zi nokutumbulwa pombanda, ashike Elelondoolopa lyaShakati olya li lye ya tidha po oshoka anuwa oye li pehala ina pu uthwa okulandithilwa.

“Eeno out uvite kutya kehe egumbo oli na oompango ashike otwa hala wo muni e tu pe ehala ewanawa mpoka tatu kala nokulanditha iilandithomwa yetu opo tu vule tu ka paluthe omaluvalo getu,” Suama ta ti nomeho gakengela.
Aalandithi mbaka oya tembukila konima yomatungo goGame Complex hoka ye li pehala lya kaka noonkondo oshoka oye li polwaamba lwokanala hoka ka pita mOshakati, noshi li sha nika oshiponga unene tuu sho ye li ta ya landitha iikulya okuzilila pehala lyi li popepi nokanala hoka ke na omeya gafa inaaga yogoka nawa.

“Iilandithomwa yetu ngashiingeyi ihayi landwa we oshoka pehala mpaka itapu vulu okuthikama iiyenditho, naantu oye li ya fa ya nyanyala molwa omudhingoloko moka tu li , nota tu hupu shokadhila oshoka niilandithomwa yetu ohayi yonuka mbala ,” Sarafina Moses, omunamivo 26 ta holola.

Okwa ti ohaya landitha iiyimati niihape mbyoka ngele inayi landwa po konima yomasiku gontumba ohayi yonuka noye na oku yi ekelahi oshoka kape na we ngoka ta vulu oku yi landa.

Omunamimvo 56 Eduvika Lukas ngoka naye ha landitha polwaamba lwopate mpoka okwa holola nkene ya hala muni opo e ya pe ehala mpoka ye na okulandithila oshoka yo oya simaneka oveta ashika inaya hala omaluvalo gawo ga se kondjala.
Omupopiliko gwElelo lyaShakati Katarina Kamari okwa li a holala paufupi kutya pehala mpoka aalandithi mbaka ya li inap uuthilwa okulandilithilwa nelelo olya tula po omahala gwokulandithila mondoolopa ngaashi omatala omape ashike aalandithi oyendji kaye hole oku iyutha komilandu.

Okwa ti wo pehala mpoka pwa tembukila aalandithi mbaka natango inapu uthwa okulandithilwa, Katarina ta ti pethimbo a li moonkundatana naKundana nando ina gandja uuyelele wothaathaa kutya aalandithi mbaka otaya ukithwa peni.