Uuministeli wuuhaku nonkalonawa moshitopolwa shaShana owu li metifa okukonakona omukuthi ngoka gwa ponokele aalongwa posekundosikola Mweshipandeka mOngwediva.

Omukuluntu gwoshitopolwa shaShana muuministeli wuuhaku nonkalonawa Johanna Haimene okwa ti, natango kaye na uuyelele wi ihwa po kutya oshike tashi ehamwa kaanona mboka.

“Opo tatu longekidha aanambelewa yokukonakona, opo ya ka konakone kutya oshike shi na aalongwa mboka,” ta fatulula ngaaka.

Ta ti, omakonakono gotango ngoka kwa li ga ningwa, gaali gomuyo ngoka ga thiki po, itaga ulike omukithi goCovid-19.

Haimene okwa ti ita vulu okugandja uuyelele wa gwedha po oshoka natango ke na uuyelele wi ihwa po, ihe momukokomoko gwesiku lyonena, otashi vulika ya mone uuyelele wa gwedhwa po.

“Ngele twa tseyithilwa kwaamboka taya konakona, otatu ka tseyithila oshigwana,” ta ti ngaaka.

Omukuluntu gwelongo moshitopolwa shaShana Hileni Amukana okwa ti aanona ye vule 100 oya mono uuhaku miipangelo ya yooloka moshitopolwa shaShana, sho taya a lukwa uuvu inaau tseyika.

“Itandi valu okugandja omwaalu kondandalunde oshoka aanona mboka oya yakulwa kiipangelo ya yooloka,” ta ti ngaaka.

Ta popi ta ti opo ye li metifa okugongela uuyelele awuhe, uuna uuministeli wuuhaku we ya galukile kutya oshike lela tashi ehamwa kaanona.

Amukana okwa ti, aanona otaya ulike omandhindhiliko ga fa geshikisha.

“Aalongwa yamwe oya li yi ilwa ko kaakuluntu yawo, omanga yamwe ya li ya shunwa momuhandjo,” ta ti ngaaka.

Ta gwedha po ta ti, oya tegelela okuza muuministeli wuuhaku shoka ye na okuninga konima kwa konakonwa shoka tashi ehama aanona.

Omulongwa gumwe posikola sekundo Mweshipandeka ngoka edhina lye lishiwike kuKundana okwa ti, okwali a mono ya kwawo ya falwa kiipangelo okuza Etitano taya ehama.

“Ayehe okwa li taya nyenyeta ashike oshinima shimwe, katu shi ngele eshikisha, omukithi goCovid-19, nenge pamwe oye na shoka ya lya,” ta ti ngaaka.

Ethimbo oshifokundaneki shika sha li sha ka nyanyangidha uuyelele awuhe kakwa li wi ihwa po.

– vkaapanda@nepc.com.na