Iilikolomwa yomomapya oyindji oya hanagulwa kokapuka moshikandjohogololo Oshikuku moshitopolwa Omusati. Omikunda dha adha puntano odha ponokelwa niikunomwa yawo oya lika po. Kansela gwoshikandjohogololo Oshikuku Matheus Gabriel okwa ti okapuka oka li taka tana nota ka endelele okuya momapaya.

“Iihwa nomiti kayi na omafo miitopolwa mbyoka ya ponokelwa nangashiingeyi otaka endelele okuya momapya,” Gabriel ta ti ngaaka. Miitopolwa yimwe otamu kundanwa kutya okapuka oka hanagula po nale iimeno mbyoka ya pita. Gabriel ta ti oshi li ngaa hwepo oshoka aantu oyendji opo ya pulula omapya.

Omupopiliko mUuministeli wUunamapya, Omeya nEtalululo lyOmavi Jona Musheko okwa ti uuministeli owu na uuyelele kombinga yokapuka mOshikuku. Ta ti aanambelewa oye li nale nokuli miilonga opo ya kwathele mboka ya gumwa.
Omvula ya za ko, okapuka oka li wo ka iteyele moshikandjohogololo Elim.