Omolwa omvula ndjoka itaayi loko nawa aafalama oyendji oya sholola taya ti onkalo yonuumvo otayi faathana ashike nomimvo dha piti.

Secilia Moonde gwomukunda Epyenene moshitopolwa shaShana okwa ti, nonando omasiku ngaka omvula ya etha ko omata omashona, itashi kwatha sha we.

“Nonando kuze omvula yithike peni, iilya yetu itayi yumuka we. Otwa dhengwa twa lila, otwa hepeka ashike oonkondo niimaliwa yetu, nonando okwali tu na omukumo petameko,” Moonde ta popi ngaaka.  

Selma Daniel, gumwe gwomaanafalama mboka taya ti, omapya gawo gena iilya ya si po thilu komutenya okwa li a pulula epya lye momasiku 16 gaFebuluali.

“Nkene iilya yandje ya pitile mo mevi, Malitsa aguhe nguka omvula inayi loka,” ta popi neyeme.

Ta ti, shoka otashi ya tula muupyakadhi wo kupulula natango oshikando oshitiyali, sho oshimaliwa osho ngaa shoka tashi nyangwanyangwa, lyo ethimbo olya pwa ko.

“Kehe omumvo ota tu hepitha ashike iimaliwa, mokupulula. Otatu ningi hatu tegelele okuza  poomwendhi ndhika, opo tu tseye ngele okuna omuloka” ta ti ngaaka.

Saara Timoteus gwomokunda Etilyasa okwa ti, aanamukunda aakwawo nayo, otaya lili kiilya yawo ya sa po komutenya.

“Omvula oya ningi ethimbo inaayi loka. Otashi yematake,” ta popi ngaaka.

“Iilya yandje oya sa po thiluthilu, kandi na nkene ndina okuninga, otandi tegelele ashike okukwata openzela opo ndi kalade iilya koAngola oshowo omakutu guusila,” Sirka Malakia gwomokunda Onanyalala ta popi  ngaaka.

Simon Shiyagaya gwomomukunda Ongali, moshitopolwa shaMusati okwa ti, oya ikwata pomutima, ya tila iimuna yawo yise po kenota.

“Omwiindhi oguli hwepo ashike omeya miishana kamuna sha, ngeno okwali tayi loko nduno opo omeya ga hupithe iimuna,” ta popi ngaaka.

Shiyagaya okwa ti, kombinga yiilya hwe po, oshoka miigandhi natango omuna ngaa mbyoka tayi vulu okuya hupitha omvula ndjika.

“Oongombe niikombo ngele ya si ota tu keyi adha we peni?” ta pula ngaaka. -vkaapanda@nepc.com.na