Nonande aanasikola mboka ye li mondondo 11 nomondondo 12 moshilongo ashihe oya tameka okuya kosikola ohela, aanona oyendji yokoosikola hamano dhomoosikola 41 moshitopolwa shaMusati oye li natango komagumbo oshoka oosikola dhawo itadhi vulu okukaliwa kaanasikola pethimbo ndika lyoCovid -19.

Aanasikola ye vulithe po1000 moshitopolwa moka oya tegelelwa ya thigwe po kelongo ngele elelo lyelongo moshitopolwa moka inali ninga omalongekidho ge li nawa okusa oshimpwiyu kutya aanasikola mboka otaya longwa omanga omashongo ngoka ga taalela oosikola taga kandulwa po.

Omukuluntu gwElongo moshitopolwa shaMusati Laban Shapange okwa koleke kutya oosikola ndhoka inadhi patuluka omolwomashongo ogendji ngoka dha taalela. Ta ti ookapyoko muuministeli welongo ngashiingeyi oye li ya ipyakidhila  okukutha oondando dhiinima mbyoka ya pumbiwa opo omikundu ndhoka dhi kandulwe po.

Oosikola ndhoka unene odha taalela omikundu ngaashi oopomba dhomeya tadhi ziya, omeya itaga pombwa ga gwana okuya koondunda dhokukala moosikola noshowo oopomba dha teka.
Epangelo olya tula po oondjindikila ndhoka dha pumbwa okulandulwa ngele tashi ya pepatululo lyoosikola ndhika molwomukithi gwoCovid -19 ngoka gwa dhipaga aantu oyendji muuyuni. MoNamibia natango inamu lopotwa eso lya etithwa komukithi ngoka moshilongo.
Sho Kundana a yi moonkundatha nomukuluntupitithi muuministeli welongo, Sanet Steenkamp, okwa hokolola kutya oshi li oshinakugwanithwa shaakuluntupitithi yelongo miitopolwa okusa oshimpwiyu kutya aalongwa mbaka inaya pitililwa po kelongo omanga omikundu ndhoka tadhi kandulwa po.

Steenkamp ngoka a koleke kutya naye omikundu oku dhi shi okwa hokolola kutya oosikola dhilwe omikundu otadhi vulu okukala dha kandulwa po meendelelo, kakele kosikola yedhina Onesi Senior Secondary School ndjoka yi na omukundu omunene go otagu pula oshimaliwa oshindji.
“Nonande osikola ndjoka oyi na omukundu omunene, onda nyanyukwa oku ku lombwela kutya ngashiingeyi Onesi noshowo oosikola dhimwe nadho otadhi ka mona omakwatho okuziilila kehangano lyoAfrican Development Bank mokukala dha opaleka omapuko ngoka taga imbi aanona okuya kosikola hoka,” osho a hokolola ngaaka.