OSHAKATI - Aafuthi oyendji otaya lopotwa ye li kOnawa, sho aantu oyendji ya li ya tembudhilwa ko okuza komalukanda ga yooloka mOshakati.
Omalukanda ga yooloka mwa kwatelwa Oshoopala, nendhina lya tseyika nawa Ankambya oga li ga tembundhilwa kOnawa, nelalakano lyokutula omalukanda pehala limwe.
Aakalimo yamwe yomwaamboka ya tembudhilwa kOnawa inaya nyanyukilwa etembudho omolwaafuthi haya longele aantu omiyonena kolukanda hoka.
Aakalimo mboka ya li ya tembudhilwa kOnawa mo2019, oya kala nokunyenyeta kutya otaya yugwa iinima yawo oshowo omagumbo gawo taga iteyelwa kaafuthi esiku kehe.
Taya ti, nonando etompelo lyokutembudhilwa kOnawa oye li uvite ko, kaku na egameno.
Mboka ya li ya tembudhilwa ko tango, oya kala ye li ompinge okutulwa popepi naamboka ya tembudhwa okuza kOshoopala oshoka anuwa oyendji yomuyo aafuthi.
Nangombe Matias okwa ti oya kala ethimbo taya indile ya gamenwe oshoka inaya manguluka we molwaafuthi mboka ye ya popepi.
Ta indile ta ti, otashi kala oshihwepo ngele taya tulilwa ko osasiona nenge ehala lyopolisi oshoka oya pumbwa egameno.
“Omalukanda paife oga ya mumwe, onkene otatu indile elelo lyondoolopa natango lyi tale ko kombinga yegameno oshoka oonkalamwenyo dhawo odhi li moshiponga,” ta popi ngaaka.
Matias ta ti, aantu oyendji otaya nyenyeta kutya oye li muupyakadhi waafuthi.
“Aakalimo yomomikunda dhi li popepi oshowo omalukanda ngaashi Oneshila nOkandjengedi nayo otaya nyenyeta ya taalela uupyakadhi wa tya ngaaka,” ta ti ngaaka.
Martin Shafoihuna gwomolukanda Oneshila okwa ti, omagumbo gawo oga kala taga teywa koombudhi nkene olukanda ndoka lwe ya po.
“Onda kala mo oomvula dha pita 25, ihe kakwa li handi uvu aantu taya kondekelwa momagumbo, shapo ongele wa thigi oshinima shoye pondje kaape na aantu opo to adha sha yakwa po,” ta hokolola ngaaka.
Ta ti, oondunda dhomanwino otadhi teyagulwa omanga aantu ya kotha, ihe uupyakadhi awuhe mboka otau ziilile kolukanda Onawa.
Omupopiliko gwelelo lyondoolopa yaShakati Katarina Kamari okwa ti, oye uvite ko omanyenyeto goshigwana, ihe oya tembudhile aantu kombinga hoka omolwomatompelo gongushu.
“Elalakano olyokuhumitha komeho nokuyambula po ondoolopa yetu, okugandja omahala kaakalimo yetu, yo ya kale momahala ga yela noge na omayakulo agehe ya pumbwa,” ta ti ngaaka.
Ta ti, okutulilwa okasasiona kopolisi kOnawa, osha tulwa miilonga, oya tegelela ashike eyamukulo okuza kuuministeli mboka ya ningi omayindilo kuyo.
Aantu ya thika 3 000 oya tembudhilwa kOnawa okuza komalukanda Oshoopala, Kalaula oshowo Oshimbangu.