Aaniilonga yepangelo haya longo mendiki lyaanyasha mOshakati, ndyoka lyi li kohi yuuministeli womaudhano, aanyasha nomayakula gopashigwana, oya kala nokutaamba oondjambi dhawo omanga ye li momagumbo.
Shoka osha li sha etithwa komeya ngoka ga pata okuza Desemba gwomumvo gwa yi, sho anuwa osenda ndjoka yi li moondjo dhomeya, noshimaliwa shi vule poN$100 000.
Omuniilonga gumwe ngoka edhina lye inaa hala lyi popiwe omolwagameno, okwa ti oya taalela uudhigu womeya ga pata ethimbo nuule, naashoka oshe ya thiminike okukala momagumbo gawo oshoka itaya vulu okukala moombelewa dhaa na omeya.
“Ohatu pititha po ngaa omasiku inaatu ya kiilonga, ihe hagendji. Ashike ngele twa yi ihatu kala ko ethimbo ele,” ta fatulula ngaaka.
Ta ti ohaya vulu okukala piilonga oowili ndatu nenge ne, ihe hakehe siku, oshoka uuna ya hala okulongitha okandjugo, ohaya yi kongeshefa yimwe yi li kondje yetungo hoka haya futile uundjugo. Iilonga yomombelewa ngele ye ya po, ohaya yi ye ke yi longe po koombelewa dhawo kOndangwa. “Otwa kambadhala okushanga oombaapila okuya koombelewa dhetu oonene, ihe kashi ivule, sigo onena omeya oga pata,” ta nyenyeta ngaaka. Ta ti, aaniilonga yamwe ohaya kala ya hala omeya okulongitha oompumbwe dhimwe, ngaashi okunwa omwiti, ihe kage po. Ta ti ohashi pula a kale ta etelele okandini komeya.
Ta nyenyeta ta ti, oomwedhi odhindji unene, shoka otashi ulike okwaanako nasha.
“Shika inashi holoka ashike moshitopolwa shetu, ihe otashi dhumwa miitopolwa yilwe wo, kokutya uuministeli wowene owo waana ko nasha naaniilonga,’’ ta popi ngaaka.
Kamari ka li a gandja kutya ingapi ya etitha osenda opo yi tetelweko omeya. Omukuluntuwiliki muuministeli womaudhano, aanyasha nomayakulo gopashigwana Mbumba Erastus Haitengela okwa kwashilipaleke kutya uuministeli otau kala wa futa oongunga ndhoka momasiku 12 Aguste nuumvo.
“Uupyakadhi mboka owa li wa etwa omolwuumbapila womayalulo giifuta wa li inau futwa pethimbo, pethimbo kwa li hau endelee kopoosa pethimbo lyoCovid-19 mo 2020/2021,” ta popi ngaaka. Ta fatulula kutya shoka osha li sha etitha oondjo, oshoka ka kwali wa futwa awuhe pethimbo. Ta gwedha po ta ti, oya kala ethimbo nuule taya pula elelo lyondoolopa lyi gandje ookopi dhuumbapila womayalulofutilo uukulu, ihe shoka elelo lyondoolopa kakwa li lye shi ninga.
“Oshimaliwa shokufuta opo shi li sha gwana, notatu ka futa omeya ngoka ga kale ga patuluka,” ta popi ngaaka. Haitengela okwa ti, aaniilonga kaye na epuko sho ye li komagumbo, oshoka itaya vulu okulonga mehala lyaa na omeya.
“Pantseyo ndjoka tu na aaniilonga ohaya yi kiilonga. Uudhigu mbuka womeya otau ya pehulilo, na itawu ka holoka we,’’ ta ti ngaaka. Omugandji gomauyelele melelo lyondoolopa lyaShakati Katarina Kamari okwa ti omeya oye ga tete ko omolwoondjo ndhoka dha ningi odhindji. “Omeya ngele oga yi meendjo ohaga tetwa ko, ngoka ogo omulandu gu li po nale, nongele oga futwa natango otatu ke ga patulula ashike,” ta popi ngaaka.
vkaapanda@nepc.com.na