New Era Newspaper

New Era Epaper
Icon Collap
...
Home / Aanona ya lala mondunda nomudhimba

Aanona ya lala mondunda nomudhimba

2023-01-30  Victoria Kaapanda

Aanona ya lala mondunda nomudhimba

Omudhimba gwokanona komimvo ndatu ogwa li gwa hololwa kuunona uukwawo esiku lya landula sho ka hulitha.

Sha ikwatelela komukuluntu gwopolosi moshitopolwa shaMusati Ismael Basson, oshinima shoka osha holoka momukunda Oluhalu momindhingoloko gwaTsandi.

Otaku hokololwa kutya uunona mboka wu na omimvo ntano oshowo hetatu owa li pamwe nokanona hoka ka si omeya, omanga aakuluntu ya yi koondingosho.

Sho anuwa okanona hoka komimvo ndatu ka gwile momuthima okwa li ka kuthwa mo kuyakwawo mboka yaali.

Basson okwa ti okwa li ya hilile omudhimba mondunda yokulala, e taya siikile omudhimba nelapi.

Sho anuwa aakuluntu ya galuka koondingosho kongulohi oya thikile ashike taya ka lala, naanona mboka okwa li ya ka lala pamwe nomudhimba ngoka.

Ta ti esiku lya landula sho ya penduka opo kwa li ya holola omudhimba gokanona hoka.

Omugandji gomauyelele gwopolosi moshitopolwa shaMusati Anna Kunga okwa kumagidha aakuluntu, ya sile aanona oshimpwiyu konima a dhimbulula kutya omaso guunona wu na oomvula oonshona otaga yi pombanda.

Ta ti, aakuluntu naya sile aanona oshimpwiyu.

“Omeya oshinima sha nika oshiponga, unene kaanona. Ndika ethimbo lyomvula, ihe omaso guunona tawu si komeya otaga yi pombanda,” Kunga a popi ngaaka.

Okwa gwedha po ta ti aakuluntu naya kumagidhe aanona kaaya dhane yo ya kale kokule nomithima, omatale oshowo oondungu dhomeya.

- vkaapanda@nepc.com.na


2023-01-30  Victoria Kaapanda

Share on social media