Omagumbo ge li 12 anuwa oga pi po thiluthilu ongula yEtiyali, ihe natango inaku shiwika omulilo ngoka mpoka gwa zi.

Opolisi moshitopolwa shErongo oya lopota kutya oshiningwanima shoka osha holoka molukanda Tulunawa, ndoka lu li popepi nomapandaanda gomadhina Monica Geingos oshowo Stefanus Shipanga.

Otaku hokololwa kutya omulilo ngoka okwa li gwa fike tango egumbo limwe sigo gwa taandelele komagumbo ga landula ko, nogwa thigi aantu ye li 16 kaaye na omalukalwa. 

Opolisi oya kwashilipaleke kutya kape na omunutu a hulithila mo nenge a mona oshiponga.

Kadhimamulilo sho anuwa a ka thika poshiningwanima shoka okwa adha nale omagumbo ngoka ga hanagulwa po komulilo.

Moshiningwanima shimwe sha faathana, ombashu yimwe oya pi po thiluthilu kolukanda DRC, moshitopolwa shErongo, ihe inamu monena omuntu oshiponga.

Otaku hokololwa kutya mwene gwombashu ndjoka ya pi, okwa li ta tema pondje.

Anuwa okwa li a thigi po ombiga ye ndjoka kwa li ta tema, a yi puushinda, hoka anuwa inaa kala ethimbo ele.

Sho anuwa a ka galuka, okwa thikile momulilo gwa yaka egumbo lye.

Omulumentu ngoka anuwa ina vula okugandja uuyelele nkene omulilo ngoka gwa fike egumbo.

Omulilo moshitopolwa shErongo ogwa kala tagu dhana onkandangala okuza omimvo mbali dha piti, noomwenyo odhindji odha faalelwa.

Opolisi moshitopolwa shErongo oya kala noku lopota oombashu tadhi pi, unene kolukanda Tutaleni oshowo DRC mOmbaye.

Aakalimo oya kala noku pewa omalongo nkene yena okukwata omulilo, okuyanda omaupyakandhi ga tya ngaaka.

Okwa ndhindhilikwa olwindji omulilo hagu etwa ko makaya, okuteleka omanga yeli kohi yiikolitha oshowo kuulehite.

Omvula ya ziko petameko aantu yamwe mboka kwali yathigwa po mutenya omolwa omililo gombaandhilila okwali ya pewa omagumbo.

vkaapanda@nepc.com.na