Opolisi moshitopolwa shaShikoto otayi indile oshigwana shi lopotele opolisi yili popepi ngele ya mono aantu mboka ya ningi ethimbo ya kana, yeli ya ne.
Omugandji gomauyelele gwopolosi moshitopolwa shaShikoto Ellen Nehale okwa ti aantu mboka oya kana omasiku ga yooloka mwa kwatelwa okanona komimvo mbali, omulumentu gumwe naakiintu yaali.
Otaku indilwa wo moshigwana ku kehe ngoka wa mona omulumentu gwedhina Sem Ihemba, gomimvo 20 opo a lopotele opolisi yi li popepi.
Ihemba okwi ihulwa okumonika momasiku 16 Febuluali nuumvo, momukunda Amudhilo mOnyaanya.
Oonkambadhala dhoku mu mona odha hulile muunyengwi, notaku indilwa ku kehe ngoka wu shi mpa eli wu notheleko opolisi yopopepi nenge wu tseyithile meme gwe, Taimi Tangeni Nashiwaya konomola 0813100699 nenge opolosi yili popepi.
Opolisi natango otayi kongo omukiintu gwomimvo dhopokati nokanona ke, komimvo mbali.
Otaku hokololwa omukiintu ngoka gwe dhina Ndamonanhenda Petrus okwali a monika hugunina sho kwali ta kwata oolefa pOmwandi.
Opolisi oya ti omukiintu ngoka okwali a laleke kutya otayi komukunda Omunyekadi koshitopolwa shaHangwena.
Hoka anuwa aakwanezimo ya li ya pula ngele okwa thika ko ihe ina thika ko.
Tayi ti, aakwanezimo okwali ya pula kaandja he yokanona kOkalongo hoka nako anuwa inaathika.
Omukiintu ngoka anuwa okwa li a zala oJean ombulau nokambindja okaludhe. Okanona hoka eli nako anuwa ihaka popi.
Otaku kongwa natango omukiintu gwomimvo 18 ngoka anuwa ali ayi a katalelepo kaandja ya kuume ke komiihole koAngola ihe ina galuka ko.
Omukiintu ngoka okwa tseyika nedhina Joleni Ashikoto.
Otaku hokololwa kutya Ashikoto okwa a ihulwa oku monika momasiku 10 gaJanuali nuumvo.
Omulumentu gwe anuwa okwali a galukile moNamibia oye awike, ihe sho a pulwa anuwa okwa ti Ashikoto okwa kala ko oshoka ita vulu okuyoga omeya gefundja, ega taaguluke ogendji.
Opolisi omulumentu ngoka anuwa sho kwali amono ethimbo lyuuka komeho ye ta pulwa pulwa, okwali a iyaka po mpoka a li ha kala.
Anuwa naye keshiwike we mpoka eli paife.
Opolisi otayi indile moshigwana ngele oshina uuyelele kombinga yaantu ayehe mboka, ya lopotele opolisi. -vkaapanda@nepc.com.na