New Era Newspaper

New Era Epaper
Icon Collap
...
Home / Aapolisi mOshana ya kunkililwa kaaya shunithe ko we aakwashigwana

Aapolisi mOshana ya kunkililwa kaaya shunithe ko we aakwashigwana

2022-11-03  Victoria Kaapanda

Aapolisi mOshana ya kunkililwa kaaya shunithe ko we aakwashigwana

Opolisi moshitopolwa shaShana oya ti oya ndhindhilike omwaalu tagu indjipala gwaantu taya nyenyeta omayakulo inaaga wapa koosasiona dhimwe.

Oshigwana anuwa otashi nyenyeta tashi shunithwa ko uuna tashi kongo omakwatho kopolisi, unene ngele kaye na uuyelele waafekelwa moshiningwanima.

Omukuluntu gwopolisi moshitopolwa shaShana Commissioner Naftal Lungameni Sackaria okwa ti, aapolisi naya gwanithe po iilonga yawo ngaashi naana yina okulongwa. “Kashili nando omondjila okushunitha ko oshigwana omanga tashi kongo omakwathelo gopolisi. Aapolisi oye li le po okuyambindhindha oshigwana uuna shina uupyakandhi,” ta nyenyeta ngaaka.

Ta ti, shoka nashi mone ehulilo, na kehe ngoka taka shunithwa ko nenge taka shuna kegumbo inaamona omayakulo omanga oosasiona dhina aapolisi, neshi lopote komukuluntu gwosasiona nenge kaapevi kuluntu yosasiona. Omugandji gwomauyelele moshitopolwa shaShana Thomas Aiyambo oomwendhi dhayi, oombelewa dhawo okwa li dha talelwapo koshigwana tashi nyenyeta kutya opolisi itayi gandja omayakulo agehe kaakwashigwana.

“Shika okwa li sha lopotwa tashi ningwa kaapolisi koosasiona ndhilwe, ihe haadhihe moshitopolwa shaShana,” ta fatulula ngaaka.

Ta ti, oshigwana sho sha kutha onkatu shi thike  kopolisi omolwa shoka shina uupyakandhi, ihe kashili mondjila aantu taya shunithwa komagumbo inaaya ya kulwa. “Mbyoka oyo iilonga yawo, onkene oyena okuyi gwanitha po,” ta popi ngaaka.

Aiyambo ta ti, ta gandja oshiholelwa she teyo lyomagumbo, ta ti, iinima yilwe ohayi kala ya tulwa mooinsurance, ihe opo iinima mbyoka yi vule okufutwa opena okukala pena olopota yopolisi, tayi ulike kutya egumbo olya teywa shili.

“Uuyelele mboka omuntu otekeu kutha peni ngele opolisi itayi yambindhindha okuninga iipotha. Aapolisi naya longe iilonga yawo,” ta kumagidha ngaaka, 

Ta gwedha po ta ti, opolisi ohayi pula anuwa kutya ngele opena nenge oyeshi omufekelwa, ihe ngele kapena omufekelwa nenge keshiwike, itaya  vulu okuninga oshipotha.

“Oshipotha otashi vulu okuningwa nonando kapena omufekelwa, oshipotha ohashi ningilwa okuyambindhindha momakonakono goshiningwanima,” ta fatulula ngaaka.

Aiyambo okwafatulula kutya mboka ya lopotwa yeshi ningi, oya tothwamo no taya londodhwa yeshi hulithe po.

vkaapanda@nepc.com.na


2022-11-03  Victoria Kaapanda

Share on social media