Opolisi yaAngola oya manga po aapolisi yaali shi na sha  neso lyomunasikola posikola Shaanika Nashilongo,  ngoka a yahwa momutse Olyomakaya ga zi ko.

Omukuluntu gwopolisi moshitopolwa shaMusati Titus Shikongo okwa koleke kutya aapolisi ye li yaali oya mangwa po, noye li konima yekumba moAngola.

Otaku hokololwa kutya omulumentu ngoka okwa li a yi koAngola a ka talela po aakwanezimo ye Etiyali lya zi ko.  Olyomakaya ngoka anuwa okwali ya yi kehala lyomaninwo, lyomumwayinamati kolukanda Otilindi. ‘’Otundi 22h00  yuusiku sho yali ya dhenge, omupolisi gwaAngola ngoka halongele poongamba dhOkapalelona okwali ayi pehala mpoka, ta pula lyi pate,” ta hokola. Ta ti, shoka anuwa okwali sha etitha oondjuma po kati kaapolisi yamwe ya adhika pehala mpoka yomoAngola oshowo mboka yali eya okupatitha ehala. Otaku hokololwa kutya, mwene gwe hala okwali a pata ehala konima yethimbo, no kwali agandja ohauto komumwayina ngoka nakusa paife, afale aakuluntu yamwe kogumbo. “Aapolisi yaali yaAngola okwali ya pula omulumentu ngoka akankameke ohauto ye, sho yali ya zimo ayehe, omupolisi gumwe  okwali akutha ondjembo eta yaha omulumentu ngoka momutse,” Shikongo ta ti ngaaka. Ta ti okwali afalwa koshipangelo kOutapi tango, etaka tuminwa koshipangelo kOshakati hoka aka hulithila esiku lyalandula. Opolisi yaAngola oyili metifa okukonakona oshipotha shoka, oshoka oshiningwanima osha ningilwa moAngola.