Victoria Kaapanda

OSHAKATI - Aashingithi mboka yaa na omahala gaaluhe gwokulanditha pomatala gaAupa Indongo mOshakati oya hala okupewa uuthemba opo ya kale taya landitha omasiku gatatu moshiwike opo ya mone ompito yokulanditha iilandithomwa yawo. 

Taya nyenyeta kutya omasiku ngoka ye na ngashiingeyi inaga gwana. 
Aashingithi mboka ya pewa ehala lyokupindika pehalandjandja ndyoka lyi li komeho gomatala, ohaya futile omahala gawo kehe mesiku iimaliwa yi li kohi N$20, sha ikolelela koongeshefa dhawo.  

Hendrina Isak ngoka a ninga ethimbo ta landitha pehala mpoka okwa ti omasiku ngoka ya pewa kumuni omashona okulanditha, naya gwedhelwe ga kale ge li gatatu.

Isak okwa ti oya pewa ashike okulanditha mOmaandaha nEtitano, ta ti oya hala ya pewe uuthemba wokulanditha sigo Olyomakaya. 

“Olyomakaya olyo esiku ewanawa okulanditha, aantu oyendji ohaye ya kondoolopa. Otatu indile ngaa natango muni e tu kwathele opo e tu sile ohenda tu gwedhelwe esiku ndyoka limwe, ta ti ngaaka.
Ta popi ta ti oya hala okulonga ya itula mo ya mone oshimaliwa sha gwana opo ya vule okukwathela aanona mboka ye li koosikola osho wo okutula omboloto poshitaafula.

Omukuluntu gomkwatathano mombelewa yElelo lyondoolopa Katarina Kamari okwa ti omasiku ngoka ya pewa oga gwana.  Ngele oya gwedhelwa omasiku otaya tumakanitha oongeshefa dhaamboka ye na uutala meni lyomatala haye wu futile.

“Okwa li ashike twe ya sila ohenda oshoka itatu vulu oku ya tidha, kaye na mpoka taya yi. Onkene otwa li twa kambadhala okuyapa okampito hoka opo nayo ya mone ompito yokulanditha,”Kamari ta popi ngaaka.
Ta ti tango oya li ye ya pe ashike esiku limwe lyokushingitha, konima sho kwa li ya dhimbulula kutya esiku limwe inali gwana okwa li ya gwedha ko esiku etiyali. 

Veronika Ndawuya ngoka ha landitha pehala mpoka okwa ti omasiku ge li gaali omashona. Ye oha landitha iikutu he ke yi tala kokule, ihe ohayi kwata ethimbo  okupwa po oshoka omasiku gokulanditha omashona.
“Ndjika oyo onkambadhaa ashike tatu vulu okuninga opo tu mone oshimaliwa. Tse inatu longwa nonande ope na yamwe ya longwa, ompito yiilonga inaye yi mona. Tu kwatheleni,” Ndawuye osho a popi neyeme ngaaka. 
Ta ti ngele muni ita vulu okugwedhela omasiku, na yeya ningile uutala pehala mpoka ye li opo ya mone omahala gaaluhe.