Aayelele yamwe moshikandjohogololo shUuvudhiya otaya nyenyeta kutya natango ihaya mono omakwatho gepangelo, noya taalela onkalo ondhigu. 

Maria Salomon gwomomukunda Aluusati okwa ti, omakwatho haga gandjwa kaayelele, kega shi ohega uvu ashike ngele ya kwawo taya popi kutya oye ga mona.

“Ondi na uunona wuli uhamano mboka awuhe iihau mono nando iiyemo ya sha, okuza kepangelo ngaashi uunona uukwawo. Aanona yatatu kaye na omauthemba, nangame wo kandi na sha,” ta hokolola ngaaka.

Ta ti, egumbo lye ndyoka kwali e na lina ondunda yimwe yomwiindhi, okwali lya hanagulwa po komulilo omwedhi gwa zi ko, naashika oshe ya thigi po mutenya.

“Ihandi longo iilonga yomepya oshoka ka ndi na iimliwa yokupulula. Ohandi kambadhala okuteka omeya gootombo mondingosho, ngame ta ndi futwa ehalasa lyotombo, tse ta tu ithigile mo naamwandje,” ta hokolola ngaaka.

Salomon okwa ti, ngele a mono taku toko, omwenyo gwe ohagu kala gwa ziyalala oshoka ke na shoka taka pa aanona ye, sha sho kulya uulalelo.

“Aanona yandje yamwe iha yayi kosikola, omolwa ondjala. Itandi vulu okukala tandi thindikile aanona kosikola ya sa ondjala,” ta fatulula ngaaka.

Ta ti, onkalo oya ninga ondhigu. Ta popi ta ti, oha kwata komandhilandhilo gwokuthiga po aanona ye, aka konge iilonga opo a vule okutula omboloto poshitopola, ihe ke na mpoka teyi thigi.

“Otandi mono iihuna, kandi na oshimaliwa shoku tameka nando ongeshefa yandje yokandingosho. Nenge epangelo nali kale tali tu pululile tse mboka katu na iiyemo opo tu longe  momapya getu,” ta pula ngaaka.

Kansela gUuvudhiya Timoteus Shivute okwa ti, sigo ompaka inaya lopetelwa aanona yaayelele ihaaya yi kosikola.

“Ayelele oye na ooprogalama ya tulwa po kepangelo okuyakwathela, no haya pewa omakwatho ngoka okuza koombelewa ndhetu,” ta popi ngaaka.

Shivute ta ti, uuna pe na uupyakandhi wuli ngaaka, oombelewa dha kansela ohandhi kundathana pamwe nooyene yomikunda yo taya tseyithile oombelewa ndhuukashike kookantu, dhi kandule po omaupyakandhi ngoka.

Ta ti, uupyakandhi mboka ohau kandulwa po mbala, uuna wa lopotwa, ihe sigo ompaka Kansela okwa kwashilipaleke kutya moshikandjohololo shUuvudhiya ka muna uupyakandhi wo ludhi ndoka.

– vkaapanda@nepc.com.na