Loide Jason

WINDHOEK-Amushanga omukuluntu gwongundu yompilameno yedhina Popular Democratic Movement (PDM) Manuel Ngaringombe okwa dhenge omuthindo kutya aakwashigwana  naya hulithe po oku monitha aanona iihuna.
 Okwa li a popi kutya aniwa eso lyuunona wu li utatu mboka wa si mehuliloshiwike lya zi ko momake gaavali naatekuli yawo endhindhiliko enene kutya aanona natango oye li taya monithwa iihuna moshigwana.
“Shoka osha pumbwa okuhulithwapo naamboka taye shi ningi oya pumbwa oku shi tula po meendelelo ngaashi tashi vulika,” osho omunapolitika a hokolola ngaaka mokatumwalaka okafupi sho a li a yi moonkundathana nomutoolinkundana nguka.
Manuel okwa ti kutya uunona owa pumbwa okusimanekwa oshoka owo oondjumbo dhokomongula noyo taya ka sila aakuluntu yawo oshisho.
Nguka okwa li ta popi ndhika oshoka oshipotha shoka tashi etitha ohenda sho omulumentu gwepipi lyopokati a fumvike omonamati  nomwenyo mepya e ta si.
 Oshiningwanima shika osha hokololwa sha holoka mOlyomakaya gehuliloshiwike lya zi ko sha holokele momukunda gwedhina Onadhi moshikandjohogololo Onankali.
Okwa hokololwa kutya nakuvala okanona hoka okwa yi megumbo moka e ta kutha okanona hoka oye he yako noku ka tula moshako ndele te ka fala mombila ndjoka a fula mepya noku ka filila mo sigo taka si .
 Omulombo ngoka gu li mepeko lyopolisi ogwa hokolola kutya ngashingeyi okanona hoka oka etwa kaandjawo yahe mOlyomakaya ogo tuu ngoka kuyina opo ka kale nayinakulu ngoka a vala he.
 Ihe omanga ina likonda omuthitu okanona hoka oka dhipagwa po nale kuhe. Epeko lyopolisi ndyoka inali gandja uuyelele wa gwana kutya yina ya nakusa okwali eli natango mekwatathano naHe nenge ahawe.
 Nakusa ngoka a li a valwa e na uulema ita vulu oku enda okwa li e shiwike nedhina  Josef Tuyenikumwe Nghuumbwavali gwomimvo mbali.