Festus Hamalwa

Ehangano loCALTOP ola yambidida omukunda Eembidi uli moshikandjohoololo shaMundaungilo, moshitukulwa shaHangwena eshi la yandja ekwafo lomboola yomeva kovakwashiwana.  Mopaife ngaha oshiwana shopomudingonoko ita shi ka enda vali eendjila dile shaashi osheetelwa omeva popepi.

Kansela woshikandjohoololo sha Munndaungilo Festus Ikanda okwa tambula ko omboola yomeva nolupandu linene. Ikanda okwa ti oshiwana shopomukunda Eembidi osha kala shi li momhumbwe yomeva okunwa.

Okwa holola yoo kutya ovakwashiwana ova kala hava ende endjila dile tava kateka omeva keendungu. Onghee Ikanda okwa ti omboola ei otai ka kwafela omikunda dihapu domoshikandjohoololo shaye shaashi oya tungwa ili pamufika woshinanena.

“Natango otwa pumbwa omayakulo ahapu moshikandjohoololo shange ngaashi eepate, oupangelo, netenda lomakwatafano, onghee hano otandi indile ovanangeshefa opo ve u ye va yambidide oshiwana shomoshikandjohoololo shaMundaungilo shaashi oshiwana oshapumbwa omayakulo ahapu,” Ikanda ta ti.

Omukulunhuwiliki wehangano loCALTOP Jefrey Mahango pefimbo ta yandje omboola okwa popya ta ti ehangano lavo otali twikile nokukala tali yambidida oikandjohoololo ei ili momhumbwe yomeva.

 “Ohandi kunghulile oshiwana opo shi kale tashi longifa omboola ei nawa, onghee hano mwene womukunda nakwashipaleke kutya omboola ei otai kwatwa nawa opo idule oku longifwa efimbo lile osho yo nokepupi tali ya,” Mahango ta ti.

Okwa ti ehangano lavo otali lalakanene oku shakeneka epangelo ondjilakati tashi pitile mokuyandja omayakulo koshiwana ngaashi naana la yandja omboola yomeva. Mahango okwa weda po ta ti oshiwana shomoshikandjohoololo shaMundaungilo na shi ye momwaalu munene opo shi katunhilwe ombuto yoCovid-19 opo ovanhu va kale veli amena.

“Ookansela na va kale tava kwatafana nombelewa yetu opo tu kundafane kombinga yomaupyakadi a taalelwa kovakwashiwana, fye tu tule po omalongekido nghee oshiwana shina okukala sha kwafelwa,” Mahango ta ti.