Victoria Kaapanda

ONGWEDIVA-Omunangeshefa asimana monooli gwedhina Erastus “Chicco” Shapumba okwa gandja egumbo lyopokathimbo oku kwathela pethimbo ndika lyomukithi goCovid-19.

Egumbo ita li kala tali edhilile mboka ya ikalekelwa konima ya zi miiyendo yokondje yoshilongo, ihe ota li kala ta li longithwa onga ombelelwa nege ehala lyokupungula iinima  yinasha nomukithi ngoka.
Chicco okwa li natango aakwathele noshimaliwa koomuma shoomwaalu guthike N$ 100 00 shoka tashi ka longithwa miitopolwa ayihe 14 oshilongo ashihe, oshowo natango okwa gandja omaloli ge li gaali oku kwathela okututa nenge okuhumba sha pethimbo ndika.

Kombanda ya ayihe mbyoka,Chicco okwa li agandja omahala gokulongithwa, koHelao Nafidi, mOvenduka popepi nokapale koodhila, mOmuthiya komeho goshipangelo  oshowo mOndangwa popepi noNored.
“Andi gandja omahala ngaaka oku kwathela mpoka pena ompumbwe, itandi katokola kutya omahala otaga longithwa shike. Ondi uvite nayi nonda sholola oshoka okwa li nda tegelela ongundu yaanangeshefa nena mpaka opo tu tsaathane onyaala kumwe se tukwathele epangelo mpoka ta li nyengwa,’ Chicco ta ti ngaaka.
Chicco okwa popi ta ti oshilongo kashina aanangeshefa, oshafa ashike oshilongo kashina aakwiita ya kwathele ethimbo pena iita. Ta ti ndika olyo ethimbo lyoku tsakaneka epangelo ondjila kati opo ayihe yi ende nawa.

Omukuluntu gwoshipangelo moshitopolwa shaShana Johanna Haimene okwa ti elelo lyondolopa yaNgwediva olya iyamba okugandja ehala lyomashingithilo mOngwediva opo lyilongithwe onga oshipangelo shanuuvu mboka taya ka kwatwa nenge taya kafekelelwa omukithi goCovid-19.

Ngoloneya gwaShana Elia Irimari okwa ti iipangelo yopaumwene ngaashi  Ongwediva Medipark oshowo Ondangwa Medipark oya gandja oondohotola oshowo aapangi ye li 60 okukwathela pethimbo ndika.
“Oshakati guest house oshowo Ongwediva rural development otaya ka gandja omahala kaapangi oshowo koondohotola tadhi kagandja omakwatho kombinga yomukithi nguka goCovid-19, oku kelela ya falele omukithi kaapambele yawo uuna ya kwatwa,”Irimari ta ti ngaaka.
Africa standthaus naye okwa gandja oondunda dhokulala dhili 30.

Ehala lyiipindi mOndangwa oshowo ehala lyaanyasha nago otaga kalongithwa onga iipangelo yaa mboka yamonika nege taya kafekelwa omukithi 
ngoka..