Uuministeli welongo owa yambindhindhwa nookompiyuta ndhili heyali oshowo omayakulo go intaneta, kehangano lyoCRAN, nongushu yithike N$200 000.

lCRAN Mufaro Nesongano Ngoka a li omunamembelewa womakwatathano koCRAN pethimbo lyegandjo lyomagano okwa yelitha kutya oompiyuta ndhoka otadhi ka topolelwa oongulumambo mbali moshitopolwa shaKhomas.

“Oongulumambo ndhoka dha tothwa mo, tandhi pewa ookompiyuta ndjoka yaNTA oshowo ndyoka yili koKhomasdal, popepi noombelewa dhaKansela,’’ ta fatulula ngaaka.

Ta ti, omahala ngoka gaali otaga ka yambindhindhwa oyendji okumona omayakulo taga pula okulongitha ookompiyuta oshowo o intaneta.

Ta gwedha po natango ta ti, otashi ka kwathela aanyasha okugwanitha po iinyangadhalwa yawo oshowo omakwatathano gopambepo.

“Ehangano lyetu lyoCRAN olya itaala mokushunitha moshigwana, sho shoka lya yambindhindha ngaaka. O intaneta oya pumbiwa ku kehe gumwe, onkene oya pumbwa okukala pomahala mpoka pena aantu oyendji opo ye yi longitha momikalo dha yooloka,’’ Omukuluntuwiliki mehangano lyoCRAN Emilia Nghikembua, ta fatulula ngaaka.

omayambindhindho ngaka oga pewa epandulo komupevi minista gwelongo Faustina Caley.

“Shika sha ningwa kehangano lyoCRAN itashi ka yambindhindha ashike aanyasha niinyangathalwa yawo, ihe otashi ya xwaxwameke noku ya tula poonkatu dhilwe oshowo okuhuma komeho meyilongo,’’ ta ti ngaaka.

Caley okwa gwedha po ta ti, omolwa ethimbo lyataalelwa, osha simana ya kwashilipaleke kutya oosikola, oongulumambo oshowo omahala haga gongalwa koshigwana ogena omayakulo ngoka opo ya endele pamwe nethimbo.

-vkaapanda@nepc.com.na