Victoria Kaapanda
OSHAKATI-Omwiimbi gwoongalo Ndapewa Kandenge a tseyika nawa Debby okwa yumudha oshitalenti she shokwiimba shoka a kala e shi dhipagapo uule womimvo 5 dha pita.
Debby ngoka a kala te shi enditha nawa mooalbuma dhe ndhoka a pitithile oomvula ntano konima okwa ti,oshitalenti ngele owe shi pewa kuKalunga ku na siku wu shi fadhukepo
Ta popi ta ti oomvula 5 dhapiti sho a tamekele okwiimba, e ta thigipo egumbo lyokwiimba oongalo okwa li a yi mongeshefa moka ngashingeyi tayi mu endele nawa lela.
“Osha kala tashi nyenyetele ndje unene ngele esiku ndyoka ongeshefa itayi ende nawa, kutya oshike itandi tsikile noshitalenti shandje ngame ndi kale tandi tidha ongeshefa moshili koombinga adhihe”. Debby ta ti ngaaka.
Ta gwedhapo ta ti elalakano lyokushuna mokwiimba kasha shi nando ashike iimaliwa, ashike ohokwe nokugwanithapo shoka omwenyo gwe tagu pula oshoka ihathuwa oku ipulapula okutsikila noongalo dhe.
“Omvula tay iya onda tokola kutya aaholi yoongalo dhandje otandi ke ya nyanyudhwa , noongalo ndhoka itadhi ka thiga nando ogumwe a kuutumba” Debby ta yelitha.
Okwa tseyitha kutya oalbuma ye ndjoka a hikile tango mo2013 oya li yi na ehwata lyoongalo 16 ndhoka dhi li mumwe ano dhomaludhi ga yooloka, moka a li a kwathelwa okwiimba komuhikingalo a tseyika nawa Mux oshowo Mandakara, mboka nomvula tayi ya oyo taya ka hikila pamwe naye natango.
Debby omuhikingalo gwoludhi kehe ashike unene oha dhenge oongalo dhopambepo oshowo house music,
“Onda pandula kehe gumwe a kala nokupa ndje omukumo opo ndi tsikile nokwiimba oongalo dhandje, oshowo kahikingalo mboka ya kala taya ithana ndje tu ka hikile oongalo pamwe kutya Januali gomumvo tagu ya ongame tandi mu patulula noongalo oontoye”. Debby ta ti.
Ta gwedha po ta ti okwa li a mono oshiholelwa shokwiimba kaahikingalo ya tseyika nawa Tunacky oshowo Jenice, aakintu mboka ya kala haya hiki oongalo thimbo ndiya ta koko noyali ye mu pe oshiholelwa oshiwanawa opo a vule okulandula oonkatu ndhoka a li a ende opo a tameke okwiimba nokuthika mpoka e li nena.
Debby okwa ti omvula tayi ya ope na okuteka iti, oshoka oalbuma ndjoka a nunina ahooli yoongalo dhe otayi thindikilwa kuuvidio u li utano.
Okwa gandja ekumagidho ta ti ethimbo ndika lyokuya pevalo ohamu kanithilwa oomwenyo dhoyendji ihe okwa hala kehe ngoka ta ka hinga oondjila oonde noofupi a hinge nuukeka opo ya hupithe oomwenyo dhaantu,. Ta ti hakuhinga kohi yomalovu.