Omulumenhu omunamido 22 okwa hangwa a endjelela mokadolongo omo h mu tulwa pakafimbo ovanadolongo ovo va yuka momhangu. Oshiningwanima eshi osha ningilwa komhangulilo yaMangestalata koGrootfontein.
Nakufya oye Desmond Khairabeb.
Khairabeb okwa kwatelwe po mEtitatu molwaashi a dopa oku liufa komalombwelo a li e a pewa momhangu oyo tuu oyo, sha landula oshikoya shoku ehamaka omunhu kolutu nokuninga omatilifo. Omupopiliko wopolifi mOshitukulwa shaOtjozondjupa Maureen Mbeha okwa ti Khairabeb okwa kala kondje yodolongo molwaashi e lifutila mo, nefiku olo okwa li a findikilwa kuxe komhangu.
“Omukainhu oo e mu ningila oshibofa okwa lombwela omhangu kutya Khairabeb onghene ta twikile oku mu ningila omatilifo, nonande omhangu ya li ya lombwela Khairabeb muJanuali kutya na xulife po okuninga omatilifo pakanya noku mu tumina ee-SMS domatilifo. Omhangu oya tokola opo a shune mo modolongo, noshimaliwa sheifutilemo osho a li a futwa okwe shi kufwa.
Konima eshi omhangu ya ninga etokolo olo, Khairabeb okwa ka patelwa mokadolongo kopomhangulilo, ye ngeno a teelele a twalwe kodolongo konima yefimbo. Otaku hokololwa olutu lomulumenhu oo le lituwa la endjelela koitenda yopekende lokandjuwo komunadolongo mukwao oo naye a li a idililwa pamwe naye lwopo 11h30. Ovapolifi ovo va li momhangu naxe oo natango a li ina  pita mo natango momhangulilo ova lombwelwa kutya Khairabeb okwe limangeleka, nolutu laye ola kufwa mo. 
Omakonaakono opolifi natango otaa twikile. -Nampa