Omukulupe weedula 83 ota hokolola ta ti okwa ninga omido 47 moNamibia ashike fiyo opaife ke na oufemba.

Frondina Mweshilongo omukalimo womomukunda Okashana Kiingo moshitukulwa shaShikoto okwa ti okwa dile koAngola momudo 1976. Mweshihonga ta ti okukala kwaye moNamibia okwa kala nokuninga eenghendabala dokuya keembelewa hadi yandje oufemba ashike iha pewa ko ekwafo.

Okwa ti omolwonghalo oyo e lihanga muyo ota dengwa koluhepo, iha kwata oshimalima shopeendjela shaashi vati ehe na oufemba woshilongo.

Pefimbo Kundana a talela po eumbo laye okwa hokolola ta ti ova hombola nomushamane waye Omunamibia nove na naye ounona ve na oufemba woshilongo. 

“Naame onda hala okukala ndi na oufemba opo ndi kale handi mono oshimaliwa shopendjela shaashi moNamibia onda kala mo eedula dihapu paife. Onda hombolwa kOmunamibia ashike fiyo opaife onda talika ko ongaa omudjadjai,” ta ti.

Okwa hokolola ta ti paife okwa kwatwa nokoho nde ya londa shaashi alushe oha kala te lipula eshi ehe na oufemba noku li moshilongo a kala mo efimbo lile.

Okwa yelifa ta ti okwa li okuya keembelewa hadi yandje oufemba ashike oha lombwelwa kutya vati ita pewa oufemba shaashi ina dalelwa moNamibia.

“Ounona vange ova ninga eenghendabala dokutwala nge kombelewa yakansela noshoyo kumwene womukunda wetu opo ndi popilwe ndi pewe oufemba ashike ihandi kwafelwa sha,” ta ti.

Okwa weda po ta ti omushamane waye okwa xulifa momudo 2000 noku li ashike meumbo laye nounona vaye vavali noshoyo ovatekulu 12.

“Ounona vange ihava longo, ohava xupu ashike mokulandifa okapana nombike keendingosho,” ta ti.

Kundana okwa ninga eenghandabala dokukwatafana nouministeli woikwameni neameno lokeengamba ashike eengodi davo itadi nyamukulwa omanga ongodi yomupopiliko wouministeli oya dima.

fhamalwa@nepc.com.na