Festus Hamalwa

Eendjamba tadi tengenekwa difike po30 noundjambwena vado ode li teyela onguloshi yEtitatu komukunda Omboloka moshitukulwa shaHangwena.

Otaku hokololwa kutya eendjamba oda dilila moAngola Etitatu loshivike eshi. Omupopiliko mouministeli womidingonoko nomatalele po Romeo Muyunda okwa ti kape na nande omunhu a monifwa oshiponga ile a dipawa keendjmba edi nonande ovakwashiwana ve na ngaa oumbada.

Okwa koleka yoo vali kutya eendjamba edi ina di longela nande omapya ovakalimo vo pomudingono ko Omboloka oilonga youshanda.

Muyunda okwa kunghulila ovakalimo vopomudingonoko Omboloka va xulife po oku kala tava tataa eendjamba edi shaashi pamwe ota didulu oku va pilukila po nokuvamonifa oiponga.

“Ombelewa yoministeli yomidingonoko oya tuma ovanambelewa vaya komukunda ou wambolokotelwa keendjamba opo va kwashipaleke kutya kape na nande omunhu taka monifwa oshiponga ile ta kanifa omwenyo, vo vaka keelela oifitukuti ei opo iha longela omapya ovanhu vopomidingonoko opo ominyonena,” Muyunda ta ti.

Omboloka oi li moshikandjohohololo shaKongo nomukunda ou owa didilikwa kutya oo umwe womomikunda edi dili keengamba daNamibia nAngola, haku monika unene oifitukuti yoludi latya ngaha.

Okwa ti oshiwana na shi kale shangunguma shiha pihaneke nande eendjamba e di, shaashi ombelewa yoministeli nomidingonoko oye lilongekida nokukwashipaleka kutya oifitukuti ei oya shunifwa oku ya dja.