Ominista yelongo noonkulunkedhi Anna Nghipondoka oya ti, eshuno lyaanona koosikola itali dhengele, ashike aavali mboka itaaya fala aanona kosikola otaya kumagidhwa opo ya se oshimpwiyu kutya aanona oya mona elongo momagumbo ngaashi naanaa shili pamulandu omupe gwelongo.
Nghipondoka ta ti omulandu nguka omupe oguli miilonga sigo opehulilo lyokaliindeli koskola hoka taka hulile momasiku 18 Deseba nuumvo. 
“Osha simana opo aavali, naatonateli yaanona naanasikola yo yene ya tseye kutya iinakugwanitwa yawo oyini, eta ya longele kumwe noosikola, ko kusiwe oshimpwiyu kutya aanona ayehe oya mona elongo ngaashi naanaa tashi lalakanenwa,” Nghipondoka ta ti. 
Etseyitho ndika olye ya pethimbo omupresidente Hage Geingob a kutha po epato lyoCOvid-19 ndjoka lya li oshilongo ashihe nosha patululwa momasiku 17 Sepeteba. 

Kakele koosikola dhomomagumbo, pokati mpoka uuministeli gwelongo ogwa tseyitha  euliko lyaGerard Vries onga omupevi wiliki muuministeli moka, koshikondo shelongo tali kalelele, niilonga ye mbika oteyi tameke mesiku 01 Sepeteba.
Vries ota yi pehala lyaVeno Kauaria ngoka a thigi po oshipundi shoka omumvo gwayi. 
“Vries ota etelele ontseyo yethimbo ele metonatelo nomelelo lyoshitayi shelongo lyaakuluntu, uunkulungu, omithigululwakalo noonkulunkedhi oshowo koongulumambo, nokomahala gokukaleka iipungulwa yopandjokonona moNamibia,” osho omushangwa gwokuuministeli gwa ti.

Omukuluntu gwelongo Sanet Steenkamp okwa hempululwa momushangwa anuwa a taamba ko Vries sho a katukile poshipundi shoka shuupeha, ta ti ota tsikile okuyambidhidha oshikondo shoka opo shi humithe komeho elongo lyaakuluntu nenge elongo tali kalelele, omithigululwakalo noonkulunkedhi moshilongo. 
“Onakuziwa yoye, ontseyo oshowo euveko lyoye otali ka gandja ongushu kwaashoka tu na po nale. Otwa nyanyukwa sho tu ku na, notu na eteelelo ewanawa okulonga nangoye,” Steenkamp ta ti.
-Nampa