Ehangano lyoohi ta li ithanwa “Seawork Fish Processors” mOmbaye olya yambindhindha oosikola mbali ndhoko shitopolwa shaKunene.
Ehangano ndyoka olya yambindhindha nomatalashe goku lala ge li 129 oshowo oondjato dhoosikola ndhina iikwathithi yaalongwa ndhili 487, ndhoka kwali dha gandjwa kombelewa yaNgoloneya.
Oosikola ndhoka dha yambindhindhwa ongaashi Omuangete oshowo Otjimuhaka Primary no kwa li dha topolelwa sha ikolela kuupyakandhi wa taalela oosikola ndhoka.
Omayambindhindho ngoka anuwa okwa li ga taambwa ko kuInspekta goshikondo shOpuwo Naftal Uusiku oshowo aanambelwa yelongo yalwe yomoshitopolwa shaKunene.
Ngoka a li a popi pehala lyehangano lyoSeawork Fish Processor Annie Theron, okwa ti omayambindhindho ngoka okwa li yega gandja okupitila moproyeka ndyoka tayi ithanwa “Adopt-A-School”.
Ta ti, oproyeka ndyoka oya totwa po nelalakano lyoku gandja omayambindhindho koosikola ndili lela mompumbwe.
“Ota tu indile wo natango omahangano galwe moshilongo opo ga vule okumanga uukumwe kumwe nomahangano omakwawo, okuyambindhindha oosikolwa dhilwe dha taalela uupyakandhi oshowo onkalo ya nyayika poosikola mosikola, okupitila moproyeka ndyoka” ta ti ngaaka.
Ta gwedhapo ta ti, ndika olyo ethimbo aakuluntu ya taalela uupyakandhi wo kugwanitha po iilongithomwa yaanona ya pulwa koosikola, onkene mboka ye li mompumbwe lela oya pumbwa okuyambindhindhwa.
Ta ti ota indile omahangano ga yooloka opo ga yambindhindhe nokashona hoka yena okuyambindhindha aakuluntu oshowo aanona mboka ye li mompumbwe.
Oosikola dha yooloka moshilongo omumvo gwa ziko, odha kala noku pula omakwatho moshigwana okuyambindhindhwa omolwa oonkalo dha yooloka dha taalela oosikola ndhoka.
Ndhimwe odha kala nokupula omayambindhindho noombete, omataleshe, iipundi oshowo iitafula inayi gwana poosikola.
Osikola yimwe moshitopolwa shaShikoto tayi ithanwa Twapandula Primary, oyo yimwe yomoosikola monooli ya taalela onkalo ya nyayika pethimbo ndika.
Onkalo yosikola ndyoka oya li ya etwa puuwayela sho okavidio kaanona taya longelwa metala tali lokwa komvula, ka taambathanwa komalungula moshikandjohogololo Nehale LyaMpingana.
Anonano mboka oya li ya monika ya kuutumba kiipundi ihe kayena iitafula, omanga yamwe ya huhwa kuutalala.