ONDANGWA - Opolifi moshitukulwa shaShana otai konakona oshibofa shomulumenhu weedula 34 vati a kufa ko kombaanga oshimaliwa shoN$87 100 shakaume kaye.

Oshiningwanima osha ningwa momafiku 16 omwedi ou kombaanga yoStandard Bank mOndangwa.

Omupopiliko wopolifi moshitukulwa shaShana Inspector Thomas Aiyambo okwa hokolola ta ti nakuninga oshihakanwa okwa li a pula kaume kaye opo a tuvikile oshimaliwa komavalulilo ombaanga yaye.

Opolifi oya hokolola tai ti okudja opo vati omufekelwa okwa kufa ko oshimaliwa shamukwao ine mu pula epitikilo.

Nakuninga oshihakanwa omukwashiwana waAngola.

Omufekelwa ina kwatwa po nomakonakono opolifi otaa twikile moshimunungu eshi.

Opolifi oya kumaida oshiwana opo shi kale sha kotoka ngeenge tashi tula oimaliwa komavalulilo eembaanga dovanhu molwaashi ovanhu paife ove lininga ookalyamupombo.

Oshiwana osha kumaida opo shi xulife po okukufa ko oimaliwa yovanhu komavalulilo eembaanga inava pewa epitikilo shaashi osha nyika oumbudi.

fhamalwa@nepc.com.na