New Era Newspaper

New Era Epaper
Icon Collap
...
Home / Elenga lakula Iipumbu ta kungulile oshiwana shiha xwike omapeya

Elenga lakula Iipumbu ta kungulile oshiwana shiha xwike omapeya

2021-09-17  Festus Hamalwa

Elenga lakula Iipumbu ta kungulile oshiwana shiha xwike omapeya
Top of a Page

Elenga lakula lElelo lUukwambi Iipumbu Ndilimani ota kunghulile oshiwana shomoshikandjohoololo shUuvudhiya opo shi xulife po okukala tashi xwike omapeya.

Okwa popya ta ti okuxwika omapeya okwa nyika oshiponga shaashi ohaku dulu oku eta oshiponga shomundilo.

Pefimbo va ninga eenghundafana naKundana Etine Iipumbu okwa kunghulila oovene vomikunda opo va kale tava londwele oshiwana opo shi kale shaxulifa po onghalo yokukala tava xwike omapeya.

Okwa ti omwiidi owa fimana koimuna onghee oshiwana osha pumbwa okukala sha kaleka po omwiidi shaashi ohau liwa koimuna nokukala tau longifwa kovanhu okuvifika eenduda domomaumbo.

Okwa popya ta ti oimuna oya fimana shaashi ohai yambula po eliko loshilongo tashi pitile mounamapya.

“Kukeshe omunhu ta ka monika ta xwike omapeya ota ka katukilwa onghatu yopaveta, omo ta kala a pewa ehandukilo lopamufyuululwakalo,” Iipumbu ta ti.

Okwa ti oshiwana nashi kale shi li oupafi opo shi kale sha lopotela ombelewa yaye ile oovene vomikunda ovanhu ava tava xwike omapeya.

Okwa kunghulila ovadali vomomikunda domoshikandjohoololo shUuvudhiya opo va kale va kotokela ounona novakulupe opo ku kelewa vaha ninge oihakanwa yokupila momapeya.

Okwa weda po ta ti oshiwana nashi twikile okukala sha ya shi ka tunhilwe ombuto yoCovid-19 opo shi kelele okukala sha ninga oihakanwa yomukifi ou.

Okwa didilikwa moshikandjohoololo shUuvudhiya sha ninga oihakanwa yomapeya taa pi, omo mwa kanifila omwenyo womukulupe womulumenhu konima eshi a pya shi nyanyalifa momukunda Ondundu nOmongwa. 

Omapeya onghee ta twikile nokupya moshikandjohoololo shUuvudhiya, omo natango mwa topotwa oshiponga shomundilo wa xwika po ekove limwe Etine efimbo longula.

Ovakalimo vopomudingonoko opo iha va kofa vali shaashi ohava kala ve na oumbada womaumbo avo apye po komundilo.

– fhamalwa@nepc.com.na


2021-09-17  Festus Hamalwa

Share on social media
Bottom of a page