Uuministeli womidhingoloko owa thamuna kutya esiku lyokudhimbulukwa iiyamakuti muuyuni olya longithwa okugandja omalongo moshigwana kombinga yedhipago lyiiyamakuti shaa li paveta. Omugandji gwomauyelele muuministeli womidhingoloko, iixwa nomapashiyono Romeo Muyunda okwa ti oya ndhindhilike uulunga wiiyamakuti tau pula komeho. “Esiku ndika ohali dhimbulukiwa aluhe momasiku 03 gaMaalitsa omumvo kehe. Omimvo dha piti otwa kala nokudhimbulukwa esiku ndika kaape na omalongo kombinga yokugamena iiyamakuti oshowo iinamwenyo yilwe,” ta ti ngaaka.
Omimvo mbali dha zi ko, uuministeli owa holola kutya oopelesenda 89 dhaalongi yiikulumuna mokuyaha iiyamakuti mbyoka ya gamenwa oye li Aanamibia.
Muyunda ta ti, ngaashi oompanda, oondjamba oshowo oongaka oonkalamwenyo dhawo odhi li moshiponga oshoka oyo unene hayi dhipagwa omolwongushu yiilyo yawo.
Ta gwedha po ta ti nonando ope na egameno lya kwata miiti okukeelela iiyamakuti yi dhipagwe kaashi li paveta, natango oshigwana ohashi kambadhala okulongitha oompito adhihe moonkambadhala dhokukonda ooveta ndhoka.
“Otwa ndhindhilike kutya aantu mboka haya dhipaga iiyamakuti ya gamenwa, unene aanafaalama mboka haya tumwa kaantu taya zi koondoolopa.
Muyunda okwa popi ta ti omumvo gwa yi iipotha 68 oya li ya lopotwa mEtosha, moka mwa kwatelwa edhipago lyoompanda, aantu ya adhika nomayinga goompanda, nayamwe ye na omayinga goondjamba oshowo onyama yiiyamakuti yilwe ya gamenwa. “Aagameni yiiyamakuti mEtosha omumvo gwa yi oya longa nuudhiginini, oshoka omwaalu gwiipotha ya lopotwa ogwa shuna pevi, ngele tagu yelekwa niipotha yomimvo dha piti,” Muyunda ta fatulula.
Ta ti, uuministeli owa kala nokunkondopaleka elongelokumwe pokati kaagameni yiiyamakuti, aakwashigwana okupitila kaakaleli yomidhingoloko mEtosha oshowo ekwatathano ewanawawa sigo uuyelele wiipotha mbyoka 68 ya li ya lopotwa.
Ta kumagidha oshigwana shi kale aluhe tashi lopotele oombelewa dhawo nenge opolisi uuna ya mono aantu taya longele iiyamakuti omiyonena.
- vkaapanda@nepc.com.na