Esiku lyemanguluko ndyoka hali dhimbulukwa nokutyapulwa oshilongo ashihe, nuumvo otali ka dhimbulukilwa pambelewa moshitopolwa shaZambezi.
Esiku ndyoka ohali dhimbulukiwa aluhe oshilongo ashihe momasiku 21 gaMaalitsa.
Namibia nuumvo ota gwanitha omimvo 34, sho kwa li a mono emanguluko momumvo 1990.
Omumvo gwa yi okwa li lya dhimbulukilwa koshitopolwa shaMusati, mondoolopa Outapi. Uuministeli womauyelele owa koleke kutya esiku ndyoka otali ka dhanenwa moshitopolwa shaZambezi, shoka tashi ka fala nokunanena oompito oshowo omawunawa ogendji moshitopolwa.Esiku lyemanguluko nuumvo otali ka ndhimbulukwa kohi yoshipalanyolo “Aantu yahangana omolwomawunawa”. “Omupopi gwesiku a simana ota kala omuprsidente gwoshilongo Nangolo Mbumba, onkene okwa tegelelwa Aanamibia okuza koombinga noombinga dhoshilongo ya kale ya thika nokutyapulila pamwe,’’ wa hiya ngaaka.
Esiku ndyoka hali dhimbulukiwa nokutyapulwa omolwemanguluko lyoshilongo, ohali simanekwa omolwomapendafule ngoka ga hulitha sho taga kondjele oshilongo shi manguluke oshowo okutumbaleka mpoka oshilongo sha thikama nena.
Omunangeshefa Henry Ndala gwokoKatima Mulilo moonkundathana dhopangondhi noshifokundaneki shika okwa ti oya nyanyukwa sho esiku ndyoka tali ka dhimbulikilwa moshitopolwa shawo.
“Shoka otashi ka xwaxwameka nokuyambula po oshitopolwa shetu pamukalo gomangeshefelo oshowo eliko lyoshimaliwa moshitopolwa shetu,” ta ti ngaaka.
Omushingithi gwiikulya Suzen Malaika okwa ti, shoka sha tokolwa nuumvo osha simana kuyo.
“Etyapulo lyemanguluko otwa kala noku lyi mona ashike kooradio dhomizizimbe oshowo tali popiwa mooradio, ihe nuumvo nani otatu li mono nomeho,’’ ta pandula ngaaka. Ta ti, oshoka oondjila adhihe odha taalela koKatima Mulilo muMaalitsa, nayo otaya ka mona oompito dhokushingitha iinima yawo.
-vkaapanda@nepc.com.na