Nonando Aangola mboka ya li ya tauka moshilongo shawo omolwondjala omumvo gwa yi ya lombwela ya shune kegumbo, oyendji oya li taya manga iinguma yawo noomwenyo dha lindimana.
Yamwe oye na uumbanda kutya natango otaya ka sa ondjala, oshoka epangelo lyawo ihali gwanitha po omauvaneko hali ningi.
Sao Jao Manuele, gumwe gomwaamboka okw alombwele Kundana kutya, ke na nando ohokwe yokushuna koshilongo shawo, oshoka anuwa oku na ondjala.
“Koshilongo shetu kaku na aantu ye na ohenda nando, oto si ondjala kaape na ngu te ku yambidhidha, nepangelo lyetu ihali tu sile oshimpwiyu,” ta popi ngaaka.
Ta ti, moNamibia omu na aasinamutimahenda mboka haya gandja okashona ye na, nonando kashi shi oshindji, oshi vulithe owala.
“Shoka she tu eta koNamibia ondjala, ka shi shi kutya otwa hala okufadhuka po oshilongo shetu. Oya hala ashike twa shuna ihe shoka taya popi mpaka nena itaye ke shi gwanitha po,” ta popi ye ta tanguna ngaaka.
Manuele okwa ti, komaluvalo oya gwedh ako onkene otashi ka kala oshidhigu okugwanitha po oompumbwe dhakehe esiku, ngele oya shuna kaapu na shoka sha kandulwa po.
“MoNamibia omu na omakwatho omahwepo, shi vulithe koshilongo shetu. Epangelo lyetu otali tu ithana tu shune, ihe kali na ko nasha natse,” gumwe a popi ngaaka.
Aangola ya thika 4 000 mboka ya ningi ethimbo yeli pEtunda moshitopolwa shaMusati okuza omumvo gwa yi oya tameke okututwa Omaandaha goshiwike shikea koomabetsa.
Omukalelipo goshilongo shaAngola Consul Azeineida Cinaetano okwa ti, otaya kala taya tutu aantu mboka moongundu, naantu 47 mombesa yimwe.
“Oombetsa ndhoka otadhi kala tadhi tutu aantu iikando ihamano mesiku, taya falwa sigo opehala limwe koCunene,” ta fatulula ngaaka.
Ta ti, pehala mpoka otaya kala taya pelwa po okulya omanga taya kwathelwa nomatemo noombuto opo ya vule okushuna komagumbo gawo.
Ngoloneya goshitopolwa shaMusati okwa ti oya thindikile Aangola ye vule 2000 nale mwa kwatelwa oohanona.
“Aanona ya valelwa moNamibia ye li 73 ayehe oya mono oonzapo ndhomavalo yo natango oya shashwa,’ Endjala ta ti ngaaka.
Ngoloneya okwa li e ya laleke nombili esiku ndyoka.