Kansela woshikandjohoololo shaKongo Efraim Shipindo okwa ti ovakalimo vahapu ova tunhilwa moshikandjohoololo shaKongo eshi ombelewa yaye ya kala nokuxwaxwameka ovanhu vaka tunhilwe.

Kansela okwa ti okwa hafifwa kovakalimo vomOkongo eshi hava holoka momwaalu muhapu opo va tunhilwe ovenda yoCovid-19.

Shipindo okwa ti oshikandjohoololo shaKongo osho shimwe shi na ovanhu vahapu va tunhilwa mokufaafanifa noikandjohoololo imwepo.

Edi Shipindo okwe dipopya eshi a ninga eenghundafana naKundana Omaandaxa eshi a hokolola ta ti ombelewa yaye oya kala nokulongela kumwe nombelewa yomukulunhiwiliki wouhaku moshitukulwa shaHangwena okukala tava yandje ehongo kovanhu kombinga yefimano letunhilo loCovid-19.

“Onda kala nokuninga omitumba noveene vomikunda opo va kale tava ninga oikonga momikunda davo opo oshiwana shi kale shaxwaxwamekwa okukala shina ohokwe shokukatunhilwa,” Shipindo ta ti.

Kansela okwa ti ovanhu vatunhilwa omwa kwatelwa ovanyasha novakulupe va mana ko eevenda davo doCovid-19.

“Pefimbo twa kala a tungi oikonga momikunda oshiwana osha kala hashi holoka momwaalu muhapu okukala sheu ya okupewa ehongo” Shipindo ta ti.

Kansela okwa ti okwa pandula ombelewa youhaku yomOhangwena osho yo oovene vomikunda eshi va kala nokulongela kumwe pefimbo lokuninga oikonga.

Shipindo okwa ti ombelewa yaye otai lalakanene okukelela etandavelo lombuto yoCovid-19 ngaashi naana ouministeli wouhaku tau twikile nokulombwela oshiwana shili ufe komilandu doCovid-19.

“Otwa hala okukala twa tunhila ovanhu aveshe mOkongo unene tuu eshi oshilongo sha talela ekufikufi etine opo ovanhu va kale veli amena okukwatwa kombuto,” Shipindo ta ti.

Okwa ti ombelewa yaye otai twikile nokukala tai ningi oikonga yokuxwaxwameka oshiwana shi kale shatuninhilwa.

“Natu twikile okulifa komilandu doCovid-19 efimbo keshe shaashi omukifi ou owanyika oshiponga neenghono,” Shipondo ta ti.

– fhamalwa@nepc.com.na