ONGWEDIVA - Mexuliloshivike opolifi oya lopotelwa oibofa ya fika po12 omo ovanhu vame velimomifa oiponga voo vamwe va kanifa eemwenyo davo okudilila moiningwanima ya yooloka.
Omulumenhu weedula 19 okwa lopotwa a tuwa nombele oikando ya fika po12 ponhele yomanwino, konima eshi vati va li tava tanguna. Oshiningwanima eshi osha ningilwa molukanda laBethanie moshitukulwa sha//Kharas. Nakumonifwa oshiponga okwa tambulilwa moshipangelo shaKeetmanshoop e li monghalo ita nuwa omeva. Omunamido 37 natango okwa lopotwa a dengwa noshiti shakula komutwe komufeekelwa weedula 37. Oshiponga eshi osha ningilwa pokakamba kedina Mokalongo kel i momukunda Onanke moshitukulwa shaShikoto. Olwoodi vati ola tukuka eshi nakuninga oshihakanwa a tula eemhadi poshitaafula opo omufekelwa a hangika e li omutumba. Ava ova tameka okutanguna. Nakumonifwa oshiponga okwa tambuliwa moshipangelo shaMuthiya, nokonima okwa tuminwa koshipangelo shaShakati, oko e li mo-ICU. Koshitukulwa shaKavango East okwa lopotwa yoo omulumenhu weedula 17 a lemana konima eshi a yashwa komutonateli womaliko. Otaku hokololwa kutya omufekelwa weedula 43, okwa yasha okamatyona mokuulu konima eshi kwa li pefimbo kwa li taka teya onduda yonhumba opo a li a tonatela.
Okamatyona, nomutonateli womaliko, aveshe ova tulwa moipandeko nova teelelela va holoke komhangu.
Moiningwanima ikwao opolifi oya lopotelwa omulumenhu weedula 45 Vinia Mweshitile omunamido 45 (omushingi wohauto) oshoyo Sem Lineekela omunamido 44 (omutwaalelwa), va xulifila moshiponga shohauto pokati kOtavi nOtjiwarongo. Okwa hokolowa osheendifo shooMweshitile naLineekela sha pumwa kololi oyo omushingi wayo a nyengwa oku i pangela. Ovalumenhu ava aveshe ova xulifila ponhele yoshiponga. Ololi oya li ya humbata oipakete yomahapula tai dilile koCape Town ya finda koDemocratic Republic of Congo. Omalutu oonakufya okwa twala kokila yomOtjiwarongo, nomakonakono opolofi otaa twikile. Omulumenhu weedula 22 Imms Hermanus Ganaseb okwa lopotwa a tuwa nombele komufekelwa weedula 19 molukanda la-DRC moSwakopmund. Okwa hokolwa kutya nakufya okwa tuwa neembele oikando ihapu, ndele omufekelwa ta faduka po. Opolifi oya yelifa kutya omufekelwa okwa kwatwa po efiku la landula ko.
Omukulupe weedula 72 Julius Hengombe okwa lopotwa e limangeleka komukunda Otjikango Ekwenje moshitukulwa shaOtjozondjupa. Okwa hokolowa kutya vati Hengombe okwa hangika e limangeleka nodalate momuti u li popepi neumbo lavo. Ovakwanedimo ova shivifilwa. Nakufya vati ina fiya po omukanda washa, nopefimbo loshiningwanima okwa li a fiwa meumbo oye aeke. Omakonakono opolifi otaa pula komesho.