Okwa lopotwa ovakwashiwana vomodoolopa yaKongo va fyaala pomutenya eshi eebashu davo da hanaunwa po komhepo omanga omunhu umwe a mona oshiponga.

Oshiningwanima eshi osha ningwa exuliloshivike.

Kansela woshikandjohoololo shaKongo Efraim Shipindo okwa ti kakele komaumbo, omiti dihapu oda hanaunwa po komhepo unene tuu pendiki lomangeshefelo.

Okwa yelifa ta ti nakumona oshiponga omulumenhu weedula 28 ashike oku li monghalo i li xwepo nokwalekelwa mo moshipangelo paife.

“Mobashu omo omwa hangika yoo vali ovanhu vatanho mwa kwatelwa okaana kodula imwe ashike ina va mona oiponga,” Shipindo ta ti.

Kansela okwa ti ovanhu vamwe hava landifile koshi yomiti ova kanifa oilandifomwa yavo eshi ya hanaunwa po komhepo.

“Okwa lopotwa yoo vali eepala dolusheno komikunda dimwepo da kwatwa koluvadi ashike ina pa lopotwa omunhu a xulifa ile a mona oshiponga,” ta ti.

Lwopokati opo, Shipindo okwa ti ongeleka yaAnglican mOkongo nayo oya teka po komhepo ashike ina mu hangika omunhu.

Okwa kuamaida oshiwana opo shi xulife po okutunga eebashu popepi nomiti molwashi osha nyika oshiponga.

Komatango Etitano moshikandjohoololo shaKatana moshitukulwa shaShana  omwa kwatwa eengobe mbali noikombo ivali koluvadi, Oinamwento aishe ine oya fya.-fhamalwa@nepe.com.na