WINDHOEK-Ehanagano lyedhina African Deli ndyoka hali longo iikulya moshitopolwa shErongo otali gandja omatangala gwomoondoha kepangelo.

Shika osha li sha tseyithwa komukuluntupitithi gwehangano ndyoka sho a ti kutya  otaya gandja omatangala ga longekidhwa nawa ngoka taga thikilwa taga liwa  kuuministeli wokukondjitha oluhepo moshilongo opo ya kwathele epangalo  mokukondjitha ondjala moshilongo.

 Okwa ti kutya omatangala ogo tuu ngoka oga nuninwa nduno mboka taya mono sha okupitilamoshikonga shoFood Bank na inaga pumbwa okutulwa moofiliza.

Ehangano ndika olya gandja  nduno iipakete yi li 13 565 moka moshipakete kehe mu na oondooha dhomatangala dhi li hamano dhi li pomaludhi gaali, yimwe ondungu nayimwe oyili momuhoka.
 Okwa hokololwa kutya ehangano ndika otali tsikile nokwiitula mo miinakugwanithwa yalyo noshowo okukwathela epangelo mokushunitha pevi ondjala.

Ashike Minista gwoshikondo shoka sha tumbulwa pombanda Zephania Kameeta okwa ti  kutya epangelo ngashiingeyi olyi li po tali kondjitha ondjala kehe omwedhi mokuganda iikulya kwaamboka haya tambula okupitila moFood Bank onkene nduno shika osho ethuwo enene sho omahangano ngaka gwopaumwene ge ya okukwathela.

Kameeta okwa hokolola kutya edhilaadhilo lyoFood bank olya totwa po kOmupresidente Hage Geingob momumvo 2013 notali kwathele Aanamibia oyendji mboka ya shangithwa moshikonga shoka.
 Minista okwa hokolola nkene oFood Bank ya yi miilonga omumvo 2016 muApilili kutya aantu ye vulithe 17 000 onkene ya mona ekwatho okupitila moshikonga shokka.

“ Onda nyanyukwa sho tatu mono omagano ngaka pehala lyepangelo . Otandi mu kwashilipaleke kutya omagano ngaka otaga ka topolelwa mboka ye ga nuninwa. Onda lombwelwa kutya iikulya mbyoka twa mona nena oyi na ongushu yoshimaliwa shomiliona N$1,1” osho Kameeta a hokolola ngaaka.