WINDHOEK-Omupresidente omupeepeka gwoshilongo shedhina Republic of Congo, Felix Antoine Tshisekedi, okwa tegelelwa a talele po Namibia muule wethimbo efupi.

Shika osha holoka sho Omupresidente gwaNamibia Hage Geingob a gandja ehiyo lyetalelopo komupresitende nguka opo a hogololwa moshilongo shawo, ehiyo okwe li gandjele sho ya tsakanene komutumba gwIigwana Yahangana ngoka gwa ningilwa koAddis Ababa ehuliloshiwike lya zi ko.

Sho Geingob a yi moonkundathana dhopasheendelela naTshisekedi  oya kundathana kombinga yehumokomeho muupolitika  moshilongo shoka DRC mwa kwatelwa nkene SADC  ta kwathele oshilongo shika  unene mekalekepo lyombili, uukalinawa noshowo ehumokomeho.

“Aaleli mbaka yopaali onkene nduno ya tsu kumwe opo Tshisekedi a tale nawa ehiyo ndyoka a pewa kuGeingob a talele po Nambia ya ye muule oshinima shombili nengungumano  moshilongo shaandjawo noshowo okutamununa elongelokumwe pokati kiilongo mbika iyali,” osho amushanga gwiikundaneki Alfred Hengari a hokolola ngaaka momushangwa ngoka gwa tuminwa iikundaneki.

Hengari okwa tsikile nokuhokolola kutya Geingob momutumba gwoAfrican Union oye nduno a li omunashipundi gwomitse dhiilongo  nomapangelo  ngoka gwa li omu-32.

“Onda inekela nokwiitayela kutya oonkundathana dhoshigongalele shika otashi ka pitika opo  tu kale tu na euvoko lyiinima mboka yi na sha natse noshowo nkene tu na oku yi tameka sho tatu tsikile  okugandja eyambidhidho  moshitopolwa shetu,” osho omupresidente Geingob a hokolola ngaaka.

Geingob okwa tsikile ko kutya li wo a longitha ompito ndjoka okuhalela omayambeko omupresitende gwaMadagascar Andry Rajoelina naTshisekedi mboka opo ashike ya hogololwa.
Moshigongi omo tuu moka Tshisekedi nomupresitende gwaZimbwambe Emmerson Mnangwangwa  oya kuthile ko omutumba  nkene onkalo yopolitika noshowo yehumithokomeho yeliko miilongo yawo.