Omupresidente Hage Geingob okwa ti, aakwita yetanga lyegameno oyo ethano tali ulike ongushu yoshilongo.
Oshipopiwa she osha leshwa komupevipresidente Nangolo Mbumba, pethimbo lyoshiindingili shEtanga lyegameno sho lya tyapula esiku lyalyo mEtitatu moGroetfontein.
Geingob okwa ti, aakwiita naya itulemo mokuhulitha po omaupyakadhi ga taalela oshilongo, ngaashi iingangamithi tayi yakelwa moshilongo oshowo okukwata iiyamakuti kaashi li paveta. “Otandi kumagidha aakwiita ayehe yi itule mo miilonga yawo,” ta kumagidha.
Ta ti elalakano lyaakwiita okukaleka po oshilongo shi na ombili nelandulathano.
“Epangelo otali tsikile okuyambidha uuministeli wetanga lyegameno poompito adhihe. Nonando oshilongo osha taalela omukithi gwoCovid-19 nomawupyakadhi ga yooloka, epangelo olya gandja etengenekothaneko lyoshimaliwa oobiliona N$54 nenge oopelesenda 91 lyetengenekothaneko lyomumvo 2021/2022,” ta popi ngaaka.
Ta ti, nonando aakwiita inaya gwanithilwa po iilongitho ayehe, naya kondje nokashona hoka ke li po okuhuma komeho, shi vulithe okumwena nokushuna monima.
Presidente okwa pandula iilongo mbyoka ya kala mekwatathano nokuyambidhidha oshilongo shaNamibia uuna shi li muupyakadhi.
“Etanga lyegameno olya totwa po kaakiintu naalumentu, mboka oonkondo dhawo nohole ye na noshilongo dhe etitha ombili kukehe Omunamibia,” Geingob a popi ngaaka.
Ta gwedha po ta ti, okuza esiku lyekondjelomanguluko, ombepo ombwaanwa oshowo eitulomo lyokugamena uuwanawa womuNamibia olya kala lya simanekwa nolya dhidhigininwa.
Nuumvo esiku lyetanga lyegameno olya tyapulwa nokudhanwa kohi yoshipalanyolo “okukandula po uupyakadhi, oku kale ka po elandulathano oshowo oku iilongekidha”.
Aakwiita yaNamibia yoombandi dha yooloka oya li ya gongala
esiku ndyoka taya ulike uunongo wawo sho taya hingi oondhila, okunuka momambanda oshowo okusaluta. Etitatu, ondoolopa yaGroetfontein okwa li ya dhingolokwa kaakwiita ya za kiitopolwa yilwe yoshilongo, ye ya okutyapulila pamwe esiku lyawo.
Geingob momushangwa gwe esiku ndyoka okwa ti, aakwiita naya longe noshigwana nombili, ihe haku shi hepitha noku shi ninga nayi, naya kale ye na ombili noshigwana.