Endiki lyoopenzela dhaaniilonga yepangelo GIPF olya patulula oshitayi mondoolopa yOutapi Omaandaha goshiwike shika.
Omupeha nashipundi mehangano lyoGIPF Evans Maswahu okwa ti, oya patulula omiyelo dhawo moshitopolwa shaMusati, nelalakano lyokufala omayakulo po pepi noshigwana moshitopolwa moka.
“Okuza esiku endiki ndika lya totwa po, otwa pondola okufala omayakulo kiitopolwa ayihe 14 moshilongo. Shoka otwe shi ningi nelalakano limwe ashike, opo mboka yaali moshilando pangelo ya mone wo omayakulo, una ye ga pumbwa,” ta fatulula ngaaka.
Ta fatulula kutya, ombelewa yawo ndyoka tayi kalele, oya etwa po onga oshinakugwanithwa shawo, notayi ka yakula oyendji taya pumbwa omakwatho haga gandjwa koGIPF.
Ta ti, ope na omayakulo gamwe haga pumbwa ashike oombelewa oonene, sho sho ya eta ombelewa ndyoka yi tete aakalimo omagulu.
“Otuuvite ko esimano lyoombelwa dhetu moshilongo, sho shoka ta tu longo nuudhiginini, opo tudhi fale po pepi noshigwana opo dhi gandje omayakulo ga pumbiwa,’’Maswahu ta fatulula ngaaka.
Ta gwedha po ta ti, ombelewa yawo ndyoka ya fala kOutapi, otayi ulike nkene GIPF ena olukeno nesimaneko niilyo ye. Okwa totha mo kutya etungo olya tungwa kongushu yoshimaliwa oomilliona N$6.
Ngoloneya gwoshitopolwa shaMusati Erginus Endjala okwa ti, osha kala ondjodhi yepangelo okufala omayakulo po pepi noondolopa, ndhoka ndhili kushayi, moshilongo.
“Onga aanamibia, otwa pumbwa okuxwaxwameka aaleli oshowo aakuluntuwiliki opo ya tume omayakulo taga pumbiwa nogasimana komahala go ko kule, opo kehe omunamibia a vule okutyapula uuwanawa woshilongo shetu,” ta kumagidha ngaaka. Endjala ta ti, ngele omauwanawa nomayakulo taga etwa mondoolopa yOutapi otaga ka yambindhindha aakalimo oyendji oshoka oya ndhingolokwa noku kwatathana noondoolopa ngaashi Oshakati, Ruacana, Tsandi , Okahao, oshowo Okalongo.
Ta gwedha po ta ti, oombelewa ndhoka inandhi eta ashike omayakulo pope pi noshigwana ihe, odha humitha wo ondoolopa yOutapi komeho.