ONGWEDIVA – Iikundaneki onkene tayi tsikile okukundaneka omakwato koonkondo moshilongo ashihe, ihe okwa ndhindhilikwa taga holoka unene moshitopolwa shaMusati nOshikoto.
Omukuluntu gwopolisi moshitopolwa shaMusati Ismael Basson okwa ti, okuza muJanuali nuumvo sigo onena mOmusati omwa lopotwa iipotha yomakwato koonkondo yi li 61.
Ta holola ongeyo kiiningwanima yi nyanyaleka tayi holoka moshitolwa she, nonando taya kondjitha oku yi lwitha yi shonopale nenge yi hule po thilu.
Komufala Basson ta ti, otashi piyaganeke notashi kwelengendja nayi, okuuva oonkundana dhiimbuluma yomakwatonkonga, konima owala yiiwike iishona sho opolisi moshitopolwa ya gandja omalongo kombinga yokukeelela iimbuluma.
“Onkundana ndjoka yokanona komimvo hamano ka tetwa puukintu nokukwatwa koonkoondo, taku gwedhwa yomulumentu a dhipaga omukiintu gwe noku mu mangeleka oya uvitha ndje nayi noonkondo,’’ ta popi ngaaka. “Ta ti, omwaalu ngoka ogundji okuholoka moomwedhi ashike heyali,” ta nyenyeta ngaaka. Basson okwa ti okanona hoka oka li ka tetwa nombele puukiintu e taka kwatwa koonkondo kokamatyona okamwayinagona komimvo 16.
Oshiningwanima shoka osha holoka momukunda Uukwanampembe momudhingoloko gwoTsandi. Okamatyona hoka oka kalekwa mondholongo, nomakonakono gwopolosi otaga tsikile.
Omupehakuluntu gwopolosi moshitopolwa shaMusati Moses Simaho okwa ti oshigwana nashi hulithe po okutala ko omakwato koonkondo ongoshinima osho shi na okukala, osho wo okugandja oombedhi kwaamboka ya ningilwa omiyonena.
Ta fatulula kutya ngele omuntu ha ningilwa omahepeko gomakwakoonkondo oha vulu okudhimbululwa momayihumbato ge, onkalo oshowo eholokopo lye uuna te ya pokati kaantu.
Ta ti, omuntu e na uudhigu wu li ngaaka ihe ota nyengwa okuthika koosasiona dhopolisi na thike paahungimwenyo.
Omukuluntu gwopolosi moshitopolwa shaShikoto Theopoline Kalompo-Nashikaku okwa ti, omakwato koonkondo onkene taga tsikile nonando taya kondjitha mpoka taya vulu.
Ta ti, oya kambadhala okugandja omalongo oshowo okufatulula kutya ekwatokoonkondo oshike.
Omuhungimwenyo muuministeli wuundjolowele nonkalonawa Josephine Apoopawa Kapweya okwa ti, omalongo kombinga yomakwato koonkondo oga pumbwa okunkondopalekwa.
“Aapolisi oshowo omahangano ga yooloka oga pumbwa okumanga uukumwe kumwe okulwitha omakwato koonkondo kaaga holoke momindhingoloko dhawo,” ta ti ngaaka.
Ta gwedha po kutya onkalo ndjoka oya nyayikila, uuna gumwe a kwatwa koonkondo onkalo yomuntu ohayi lunduluka, ihayi kala we ya faathana.
Ta ti, oshilalo shoka uuna sha holoka momuntu ihashi polo.
Omakwato koonkondo oga pimbila noonkondo, kehe esiku opolisi otayi lopota omakwato koonkongo taga ningilwa aantu okuza kaanona sigo aakuluntu.
Moshiningwanima inaashi faathana omulumetu gwomimvo 25 okwa si sho i imangeleke nepaya konima anuwa ya nyenyeta nakuume ke komiihole.
Opolisi yaNamibia okupitila mepeko lyopolisi oya ti oshiningwanina shoka osha holoka
moshilandopangelo Windhoek mehuliloshiwike, molukanda Damara moKatutura.
Otaku hokololwa kutya aaholike mboka okwa li ya nyeyeta Etine, nuusiku mboka omulumentu a li a kana mo megumbo.
Okwa li anuwa i itsuwa esiku lya landula komushiinda gwawo.
Omulumentu ngoka ka kwali a thigi anyola shoka sha etitha e imangeleko.
vkaapanda@nepc.com.na