OMUTHIYA - Oshitopolwa shaShikoto osha yakula uupandi womwiidhi wu li 2 376 naambuka otawu ka topolelwa aanafaalama ye li 250. 

Iikulya mbino yiimuna otayi gwedha kiikulya yoshikukuta yaantu mbyoka ya li ya topolelwa oshigwana iiwike ya piti ya kwatela mo uusila wepungu, omagadhi gokulya noondooha dhoohi. 
Ombelewa yoshitopolwa otayi tameke okutopola iikulya yoshikukuta yiimuna miikandjohogololo ayihe yi li 11 mbyoka ya dhengwa ya lila koshikukuta.  

Ngoloneya gwoshitopolwa Henock Kankoshi okwa ti iikulya mbika oya li ya kwata ethimbo okutopolwa moshitopolwa oshoka omashango gaantu oga li ga kwata ethimbo shaashi kaga li ga ningwa pamulandu kiitopolwahogololo ngaashi oompango dhopolohalama tadhi ti.

Opo omuntu a talike ko onga a gwana okukwathelwa kopologalama, ongele maandjawo ihaamu monika oshimaliwa sha konda po N$2 600 komwedhi. Aanafaalama mboka ye na iimuna iinene yi li 26 naambyoka iishona yi li 130 ya kwatela mo iikombo noonzi nayo otaya talika ko. 

Epangelo otali gandja iikulya yimwe ngaashi oomwiidhi niimongwa yokulathwa kiimuna. Ombelewa yomupilima oya tula poshitaafula oshimaliwa shi thike poomiliona N$570 shokukwathela aanafaalama ya  dhengwa koshikukuta nosho wo aakwashigwana mboka ye li mompumbwe yiikulya

“Aantu kaya li ye na naanaa uuyelele okutseya kutya olye a gwana okukwathelwa nashike ye na okugwanithapo opo ya kwathelwe. Ethimbo limwe oto adha aantu taya pula omakwatho, ashike oye na iilonga noha ya kwata oshimaliwa shi vule poN$2 600. Sho osho nee twa li twa shunitha ko omisholondondo dhomadhina gaantu kiitopolwahogololo opo ya ka hogolulule aantu shi ikolelela kwaasho tashi pulwa kopologalama. Omisholondondo dhomadhina adhihe odha galuka, kakele koshikandjohogololo  Nehale Lya Mpingana, natango otwe ya tegelela,” osho omunambelewa gumwe gwomombelewa yangoloneya a ti. 

Eshongo ekwawo ndyoka lya taalelwa metopolo lyoompumbwe dhoshikukuta okwaa na iiyenditho ya gwana, ashike omunambelewa nguka okwa ti ombelewa ngashingeyi oya mono ololi koNDF ndjoka tayi ka longithwa.
 “Ngashingeyi oya tegelela owala okakalata komahooli okuziilila kombelewa yomupilima. Ngele oka thiki okutopola otaku tamekwa nale moshiwike tu uka,” ta ti ngaaka. Etopolo otali ka tameka niikandjohogololo mbyoka oyo ya dhengwa unene ngaashi Olukonda. Omu na omagumbo ga konda po 18 000 ngoka ga dhengwa koshikukuta mOshikoto naantu koohandimwe oye li 211 000 mboka ya taalelwa kunakaidhi.