Iimbuluma yekwatokoonkondo lyaakiintu naanona mOshitopolwa shaMusati oya indjipala noonkondo. 

Okuza muJanuali gwomumvo gwa yi sigo ohela, opolisi moshitopolwa oya lopotelwa iipotha yomakwatokoonkondo yi li 133, niihakanwa oyindji yiimbuluma mbika aanona aashona.

Omugandji gwomauyelele gwopololisi moshitopolwa shaMusati Anna Kunga okwa yelitha kutya omwaalu ngoka okuza ashike muJanuali gomumvo gwa yi sigo omasiku 13 gaMaalitsa nuumvo.

“Otatu kumagidha aavali, opo ya itule  mo  mokusila oshimpwiyu  aanona, unene mboka ye li momagumbo gu udha aantu, oshowo mboka haya kala mo naaniilonga omanga aakuluntu ya ya kiilonga,’’ ta popi ngaaka.

Ta popi kutya otaya lopotelwa omakwatokoonkondo taga ningilwa aanona kaaye shi kutya iihulo oshike, shoka tashi yonagula omadhiladhilo gaanona oshowo onakuyiwa yawo.

“Aavali naya longe aanona kombinga yokulongelwa iilonga inaayi uka, naya tseye uuna omuntu ta kambadhala oku mu longela omiyonena, opo ya vule okupopya oshowo oku shi lopota,’’ ta kumagidha ngaaka.

Ta ti, oyendji oye li momagumbo taya hepekwa, yo yamwe oya tila okupopya oshoka oya mbandamekwa.

Kunga okwa li a kumagidha ngaaka konima ya li ya lopotelwa okanona komimvo 15 anuwa ka kwatwa koonkondo komuhongi gwongeleka yaElcin iikando itano.

Oshiningwanima shoka osha holoka momukunda Okando moshikandjohogololo shOkalongo, pokati komimvo 2020 no2022.

Otaku hokololwa kutya okanona hoka oke na ohanona ndjoka tayi tengenekwa kutya he opastoli.

Opolisi moshitopolwa shaMusati oya ti omakonakono gokutala ngele ohanona ndjoka oyapastoli ngoka oge li metifa.

Nakufekelwa, Aipinge Shivute, okwa li a tindilwa eyifutilemo mondjedhililo sho a li a holoka mompangu oshiwike shika, noshipotha she osha undulilwa momasiku 17 gaJuni nuumvo.

Omugandji gomauyelele muuministeli wuukashikekookantu Lukas Haufiku sho a li a pulwa a tye ko sha komakwatokoonkondo , okwa li a fatulula kutya omakwatokoonkondo ohaga holoka nomatompelo ga yooloka, sha ikolela kwaamboka haya longo iilonga mbyoka yi nyanyaleka, shoka sha kwatela mo ongeyo, elongitho lyoonkondo pambambo oshowo mboka yu uvite taya vulu okulongela aantu shoka ya hala. Ta ti, shoka otashi vulu okushonopala nenge okuhula po uuna oshigwana tashi tsikile okulongwa noku fatululilwa kombinga yuuthemba washo, nokutseya shoka ye na okuninga uuna ya longelwa omiyonena dholudhi ndoka. “Oshigwana nashi holole lwe kutya omakwatokoonkondo oshinima kaashi li mondjila pomahala agehe, kutya okiilonga nenge omomagumbo,” ta fatulula ngaaka. Oshigwana nashi hulithe po okutala ko omakwatokoonkondo ongoshinima osho shi na okukala, oshowo okugandja oombedhi kwaamboka ya ningilwa omiyonena.  Ta fatulula kutya ngele gumwe oha ningilwa omahepeko ngoka oto vulu oku mu dhimbulula momayihumbato ge, onkalo oshowo eholokopo lye uuna te ya pokati kaantu. 

Ta ti, ngoka e na uudhigu wu li ngaaka ihe ota nyengwa okuthika koosasiona dhopolisi na dhenge konomola 106 nenge 611 oshali shamuhongi. 

- vkaapanda@nepc.com.na