Omutoolinkundana

OUTAPI - Omuprimaminista Saara Kuugongelwa-Amadhila okwa li a dhimbulukwa nokutyapula esiku lyaaniilonga  momukunda Omafa moshikandjohogololo Outapi, shika osha li sha dhanwwa kohi yoshipalnyolo “Kala kokule nuulingilingi e to toto oompito dhiilonga”. Esikulyotango lyaMai olya li lya taambwa ko tango ku simanekwe ongushu yaaniilonga muuyuni nokuyambula po onkalo yeliko osho wo okuunganeka uuyuni auhe wu simaneke uuthemba waaniilonga.
Okwa dhenga omuthindo kutya omuniilonga okwa uthwa ashike okulonga oowili hetatu ngele odhindji mesiku, na ngele odha pitilile nena omuniilonga na futwe olutaima.Omuprima ta ti epangelo olya dhimbulula omahangano gamwe gopaumwene  ngoka haga longitha aaniilonga yago oowili dha pitilila yo itaaya futwa oowili ndhoka.
Epangelo lyetu, tali wilikwa koompango dhopaigwana olya pititha oveta yaaniilonga nokohi yoveta ndjika aaniilonga ayehe oya gamenwa. Omuprima ta ti wo epangelo olya shaina euvathano nomahangano gaaniilonga goNATIONAL UNION of NAMIBIAN WORKERs (NUNW) osho wo Namibia Public Worker’s Union (NAPWU) opo ya vule okukundathana pehala lyaaniilonga oonkalo dhiilonga noondjambi. Okwa li wo a tsikile kutya epangelo olya hala okukala lyi na oshiketha opo ku kwashilipalekwe kutya kehe omuniilonga Omunamibia, ta longo mepangelo nenge momahangano gopaumwene ota vulu okukwathelwa noshimaliwa tashi zi moshiketha muka..
Ta ti oongeshefa dhopaumwene nandho odha simana oshoka odho hadhi kwatha mokugandja oompito dhiilonga opo aantu ya mone iiyemo nokufuta iifuta yepangelo osho wo okutunga iipangelo, oosikola noopate.
Amadhila ta gwedha ko kutya epangelo olya gandja oshimaliwa shi vulithe poomiliona N$5 opo shi vule okukwatha mboka ya dhengwa ya luluma koshikukuta. Ta gunu wo mboka ye hole okugandja oombumbo kaanambelewa mboka ye na oopoosa oonene ye shi hulithe po mbala. 
“Uulingilingi otatu u sindi ashike uuna aaniilonga, aakwashigwana nepangelo taya u ikanyuna,” omuprima ta ti ngaaka.