ONGWEDIVA - Magnaem Johannes (31) oshowo Selma Haikwiyu (31) opamwe naanona yawo, ohela oya penduka momapandaanda sho ya tidhwa kumwene gwehala mpoka kwa li haya zi.
Aakiintu mbaka oya hokolola kutya oya kala ya dhengela oombashu molukanda lwedhina Uukango Park mondoolopa yaEenhana, ashike ngashiingeyi oya pulwa opo ya thige po ehala.
Aakiintu mboka yaali, otaya indile moshigwana opo ya kwathelwe ehala lyokuza pakathimbo omanga taya kongo omahala gohiila. Taya ti nando otenda oyi li ashike nawa.

“Otwa li twa kwathelwa okudhengela oombashu dhetu pehala mpoka mo2010 kumwene gwehala, notwa kala nokuninga omaindilo gokupewa oopolota ihe sigo onena inatu kwathelwa,”Johannes ta ti ngaaka.
Ta  hokolola ta ti, mwene gwehala okwa li e ya po omwedhi gwa zi ko ta ti ote ya pe ashike omasiku omashona ya kale ya thiga po ehala lye, oshoka okwa hala okutunga, ihe okwa li ye mu tsile oongolo oshoka kaye na mpoka taya vulu okuya oshoka kaye na  oshimaliwa, inaya longa oomwedhi dha zi ko omolwomukithi gwoCovid-19.
Johannes ta ti, okw ali ya shuna kelelo lyondoolopa opo ya ka indile ehala lyokutula iinima yawo oshoka kaye na mpoka taye yi tula, yo kaye na oshimaliwa shoku ka konga ohiila pethimbo ndika.

“Otwa li twa pula omunani gwelelo lyondoolopa opo tu ye naye moonkundathana, ihe okwa li twa yamukulwa kutya itatu vulu okupopya naye, shapo natu mu shangele ombaapila, ndjoka kwa li twa shanga ihe inatu yamukulwa sigo onena,” Johannes osho a popi ngaaka.
Ta ti, yo oya hala ashike ehala lyokuza, oya ninga ethimbo ele ya indila omahala gawo, ihe sigo onena inaya pewa eyamukulo, taya pula kutya mboka haya pewa omahala ano ohaye shi ende ngiini nani.
Johannes okwa ti ndika ethimbo lyuutalala, onkene oya tila okukala momapandaanda nuunona wawo hawu yi kosikola, ta ti otashi nkundipaleke omadhilaadhilo guunona wawo.

Natango okwa popi kutya opolisi oshowo mayola gwondoolopa, oya yamukula kutya kaye na omahala mpoka taya vulu okuya tula nenge okupungula iinima yawo.
Mwene gwehala Lydia Elia okwa koleke kutya okwa laleke aakiintu mboka uunambo, ashike okwa kala ethimbo e ya lombwela ya konge omahala gawo, okuza omvula ya zi ko.
“Inandi ya laleka pe na nando oontamanana dha sha ihe onda hala wo okuhumitha komeho ehala lyandje, onde ya edhilila ethimbo lela, ihe kape na nando uuwinayi pokati ketu nayo,” Elia ta fatulula ngaaka.