OSHAKATI - Omupresidente gwoshilongo Nangolo Mbumba okwa ti, oshilongo osha taalela ethimbo lyomahogololo, naantu yamwe otaya ka tameke okwii tongola noku ninga uungundu, ihe shoka kashili mondjila oshoka ongundu yimwe ayike, ndyoka yeeta emanguluko.
Mbumba okwa li ta popi ngaaka esiku kwali a tsakanene noku kundathana naaleli yopamuthigululwakalo konooli.
“Onde ya okwi ilopota kaakuluntu yandje oshoka ngame omunona, kutya ongame ndili mombelewa yoku lela oshilongo, nuuna nda pogola, aakuluntu otaya vulu oku pukululandje,’’ Mbumba ta popi ngaaka.
Mbumba esiku ndyoka okwali a yelitha kutya okwali a hogololwa a ninge omupresidente sha ikolelela kekotampango lyoshilongo, ndyoka lyafatulula kutya uuna omupresident a kana ko, ohaku yi omupeha presidente a tsikile ko, paka thimbo.
Ta ti, nonando ongaaka ina kuthwa ashike miihwa, ihe okwa zilile mokambinete.
“Oyendji otaya popi kutya okwa nyanyukwa ashike sho a mono ompito yuupresidente, nasho ta hingi iihauto iiwawa. Kashi shi oshipu, ihe omupresident Hifikepunye Pohamba omukulu okwa kumagidha ndje kutya, inandi sholola, nandi indhindhimike e ta ndi thikama nda kukuta,” ta fatula ngaaka.
Mbumba esiku ndyoka okwali ya kundathana nomalela gopamuthigululwakalo omanga yeli oyo ayeke.
Omunashipundi gwomalelo gwopamuthigululwakalo Herman Ndilimani Iipumbu ngoka a li a popi peha lyomalelo omakwawo okwa ti, oya taalela omaupyakandhi ga taalela oshigwana no ga pumbwa eyidhopomo lyepangelo meendelelo.
“Omvula inayi loka nawa nuumvo omapya oga kukuta niimuna otayi ka sa enota oshoka iishana kayi na omeya, shika otashi ka kala uupyakandhi uunene twa taalela,” ta popi ngaaka.
Omalelo otaga indile omeya, omanga kuyele opo ya yande uupyakandhi we omolwa ekanitho lyiimuna ngaashi omimvo dha piti.
Ta ti, uumuna ohayi tila enota, otashi kala oshiwanawa ngele omeya ga tamekwa okupombwa omanga kuyele.
Ta gwedha po kutya natango oya taalela uupyakandhi wevi.
Mbumba okwa ti ombelewa yomupilimaminista otayi ka indhopamo momaupyakandhi ngoka gondjala.
“Ombelewa yomupilima minista otayi ka ninga omapekapeko kutya omagumbo ga ngapi ga taalela onkalo yoshikukuta opo ku landwe iikulya ya gwana,’’ ta kwashilipaleke ngaaka.
Oshigwana miitopolwa yokonooli osha ningi esiku tashi ningi omayindilo okupitila miikundaneki ya yooloka opo omeya ga tamekwe okupombelwa moondama oshowo momilonga moka hamu pungula omeya omanga ku yele.
Thomas Kamenye omunahambo, okwa ti, ngele omeya oga pombwa kuyele otaga ka thika pethimbo oshoka ohaga kwata ethimbo okuthika.
“Ndika ethimbo ewanawa omanga omeya miishana inaaga pwamo thiluthilu, ngeno sho taga ka pwa mo naangoka ga poombwa otaga ka kala gathika,” ta kumagidha ngaaka.
-vkaapanda@nepc.com.na