New Era Newspaper

Icon Collap
...
Home / Kansela ta yambidida oshikondo shounamapya

Kansela ta yambidida oshikondo shounamapya

2022-01-13  Festus Hamalwa

Kansela ta yambidida oshikondo shounamapya
Top of a Page

Kansela woshikandjohoololo shaKankolo Hans Nambondi ota yambidida oshikondo shounamapya eshi ta kwafele okutwalwa eembuto koshiwana eshi shi na oupyakadi woku ka tala eembuto kombelewa younamapya.

Kansela oha longifa otuwa yaye mwene ta yambidida ovanhu aveshe va pumbwa eembuto moshikandjohoololo shaye shaashi ovanhu vamwe ihava dulu okufika kombelewa younamapya okukatala ko eembuto davo.

Okwa ti ounimisteli wounamapya ohau kala wa ninga omalongekido eembuto doshiwana hadi kala di li kombelewa younamapya moshitukulwa shaShikoto ashike ovanhu vahapu ihava ka tala ko eembuto davo shaashi ombelewa oi li kokule.

Nambondi ta hokolola ta ti unene tuu ovakulupe ovo unene va didilikwa ve na oupyakadi woku ka tala eembuto davo kombelewa.

Onghee naashi osha eta kansela opo a kale ta longifa otuwa yaye mwene okukala ta twalwa eembuto moshiwana.

Nambondi okwa ti okwa tameka omudo wa dja ko okukala ta yambidida oshiwana okutwala eembuto davo.

“Ounamapya owa fimana shaashi ohau dulu okukondjifa ondjala noluhepo ngeenge ovanhu tava longa oikunomwa yavo,” Nambondi ta ti.

Okwa ti ota twikile okukala ta yambidida oshiwana sha pumbwa omakwafo oikwafifo younamapya opo oshiwana shi kale shi na ohokwe yokulonga nondjungu ngeenge tashi yambididwa.

Kansela okwa weda po ta ti oshiwana nashi xulife po okuya keendingosho pefimbo leevili doilonga.

fhamalwa@nepc.com.na


2022-01-13  Festus Hamalwa

Share on social media
Bottom of a page