Kuku Agri okuli metifa okulongekidha egumbo lyaakulupe mOshakati, ndyoka tali ka gandja omahala kaakulupe ayehe, oshali shamuhongi. 
Dhoka odha popiwa komunani gopokathimbo gwondoolopa yaShakati Kornelius Kapolo, esiku yali ya patululula pambelewa oprogalama yoku hawaleka ikulya yalongekidhwa nale (osopa) moshigwana, kaantu yeli 50 mesiku, ndjoka natango ya etwa po kuKuku Agri.
Kapolo okwa ti, onkalondjigilile  yaKuku Agri okugandja omakwatho moshigwana. Ta ti, natango oha ningile aakulupe oshituthi shokili omvo kehe.

Kansela gwoshitopolwa shaShakati shokuuzilo Abner Shikongo moshipopiwa she shesiku okwa ti, osopa otayi kala hayi gandjwa ya longidhwa nale.

Ta ti, otayi kala hayi gandjwa kehe Osondaha kwaa mboka yeli shili mompumbwe.
“Osopa otayi ka gandjwa momalukanda agehe gaShakati ngoka taga ka ipa oompito dhoOsoondaha mekwatelo komeho lyelelo lyondoolopa yaShakati. Osoondaha ta yiya, oyili kolukanda lumwe,” Shikongo ta ti ngaka.
Ta gwedha po ta ti, Kuku Agri shoka okwali eshi ningi onga omukalo gwokugandja nokushinitha moshigwana, ta pandula  ookasitoma dhe.
Esiku ndyoka Kuku Agri okwa gandja omatalashe, oondjato, iipeleki nosho tuu, kuunona wuna uulema wuli utano, waza momalukanda ga yooloka mOshakati.

Ooprogalama ndjoka sho ya ningi olweetho lwawo lwotango, oya gandja oosopa kaakwashigwana yeli 50.
Oya tameke tango kOmpumbu, hoka kwali kwa ningilwa epatululo lyopologalama ndjika Osoondaha ya zi ko.
Otayi tsikile Osondaha ta yiya sigo Osoondaha ya hugunina yaDesemba 2021.
Omuteliki a tseyika nawa Selma Timoteus oye a pewa oshinakugwanitha  shoku teleka osopa ndjoka  sigo esiku lya hugunina.
“Onda pandula kwaashihe Kuku Agri a ningi nota tsikile oku longela oshigwana.  Onda pewa ompito ndjika ndi kale tandi teleke osopa, no tandi ke shi gwanitha po ngaashi ndeshi inekelelwa, “Timoteus a popi ngaaka.