Ompresidente Hage Geingob okwa ti oshilongo otashi shuna kondodo onhinatu yepato. 
Eshi a li ta vilikile oshiwana onghela, omupresidente Hage Geingob okwa ti oshilongo otashi shuna kondodo onhinatu, sha tameka pokati koufiku wonena nota shi twikile oule womafiku 16 komesho. Onghalo ei yepato oya kwata oitukulwa aishe 14 yoshilongo. 
OWindhoek, nOkahandja yoo otai kala nomalandulafano a kwata moiti fa oo eli koshitukulwa shErongo.

“Ovanhu otava fi. Xulifei po oku ya keendingosho, koivilo, keengeleka, keeklaba, komangudumano oko oko haku tandavelele omukifi. Ovanhu otava fi, atusheni paife otu weteni kutya ovanhu otava fi. Handi mu ilikana kaleni momaumbo,” Geingob ta ti. 
Omalandulafano omododo onhinatu a yandjwa okwa kaleka mo:
•    Oivilo, mwa kwatelwa eehango neefya otai kala ashike ovanhu ngee ovahapu oveli 10.
•    Kape na ou ta pewa ombapila yoku ya keehango moshilongo ashishe nokeefya; odovapambele ashike vopopepi.
•    Eeklaba, okasino, nosho tuu, otadi kala da pata filu filu.
•    Ovanhu nava longele komaumbo ngaashi tashi dulika, ava tava i koilonga ovovo ashike itava dulu okukala komaumbo
•    Eengaba doshilongo ashike otadi pate, otadi patulililwa ashike eendongelwa tadi etwa ile tadi di moshilongo.
•    Oshiwana nashi djale oumaska alushe, nashi yande omangudumano nokupashiyona. 
•    Omalodu otaa kala ashike taa landifwa okudja po8h00 fiyo opo 18h00 mokati koshivike mOlomaka opo 13h00 omanga mEesoondaxa nomeehiliday ita pa kala elandifo lomalodu. 
•    Kape na ou a efelwa okweenda konima yo8h00.
•    Ofikola otai twikile nepato, kakele koGrade 10, 11 and 12, notaku ka kendabalwa opo ovanafikola ovo va kale komuhandjo. Oiputudilo yopombada nai shune kelongo lokomalungula.