Eshi kwa didilikwa kutya moshilongo omu na omhumbwe yohonde inai wana okuyandja kovanhu va pumbwa ohonde, ehangano lokuyandja loNamibia Blood Transfusion Service otali twikile nokuninga oikonga meefikola eshi la ninga oshikonga kosekundofikola Mweshipandeka Etine.
Elalakano loikonga okuxwaxwameka ovanafikola opo va kale ve na ohokwe yokuyandja ohonde noshoyo neudeko kombinga nghee ohonde ya fimana.
Ovanafikola va dja keesekundofikola da yooloka monooli okwa li va kufa ombinga moshikonga eshi kwa li tava pewa ouyelele kombinga yefimano lohonde.
Ovanafkola ova pewa eedjapo eshi va kufa ombinga meetundi doshikonga.
Pefimbo ta yandje ehongo kovanafikola omupopiliko wehangano loNAMBTS Titus Shivute okwa ti ota lalakanene okukala a talela po eefikola 200 opo di dule okupewa ehongo kombinga yefimano lohonde shaashi eshi otashi yandje ohokwe kovanafikola va ye momwaalu muhapu va ka yandje ohonde.
Shivute okwa ti oshivike sha dja ko ehangano lavo ola ninga oikonga keefikola dokoshitukulwa Erongo eshi kwa li ovanafikola vahapu va holoka momwaalu muhapu okukufa ombinga.
“Ohonde oya fimana shaashi ohai kwafele ovanhu ve na omikifi da yooloka ngaashi okangela, meme eli meetelelo ile omunhu ngeenge ta tandwa nosho tuu omikfi dikwao,” Shivute ta ti.
Okwa kunghulila ovanafikola opo va kale tava topolelafana ouyelele meefikola kombinga yefimano lohonde opo ovanafikola ava vehe na oudeko la wana va kale ve na ohokwe.
Shivute okwa weda po ta ti ohonde oya fimana shaashi ohai dulu okuxupifa eemwenyo dovanhu ve li momhumbwe yohonde shaashi osha nyika oshiponga ngeenge omunhu ehe na sha ohonde ya wana molutu.
Okwa weda po yoo vali ta ti okuyandja ohonde ita kudengele ndele ota kudi kehalo lomunhu ye mwene.
Moses Josua omunafikola kosekundofikola yaMwadikange Kaulinge nokwahokolola ta ti omukalo muwa wokuxwaxwameka ovanafikola va ka yandje ohonde ongeenge ashike ehangano loNAMBTS tali twikile nokuninga oikonga meefikola dihapu.
“Ovanafikola vamwe kave u diteko kombinga yefimano lohonde kutya ohai kwafele ngeipi ovanhu moipangelo onghee naashi ohashi eta opo ovanafikola va kale ina hala okuyandja ohonde,” Josua ta ti.