Onalukekete- Olutu talu lele omaudhano moNamibia, Namibia Sports Commission (NSC) olwa li lwa gandja esimaneko komupevipresidente gwongongahangano yoAteletika moNamibia Mathew Shekutamba Johannes ngoka a li a pewa egumbo lye lyaaluhe MEtine lya za ko pOnalukekete.

Freddy Mwiya ngoka e li omutse gwo-NSC okwa li a holola nkene Mathew a li u ulike uupendafule moshilonga she shomawudhano, nando olwindji okwa li a longo kohi yomashongo goonzo ndhoka tadhi kanda omapunya, ashike ina tula omutse kepepe.

“Mathew onda li ndi mu shi lela nolundji otwa li twa tsakanene piikwamaudhano moka olundji a li u ulike nkene e na oshikondo shomawudhano komutima, Mathew okwa li a ningi omukwiinini gwaayehe mboka ya li ye na ohokwe okuya momaudhano goateletika nokwa li shili e ya kwathele nohamu nonenyanyu oshoka omaudhano kuye oga li okati komokutsi,” Mwiya ta ti.

Ta tsikileko tati iilonga yaMathew itayi ka dhimbiwa napamuthika gwongongahangano yomaudhano oku li a talika ko onga ependafule lyomaudhano, unene tuu oshilonga shika sho a li e shi ningi pamukalo gwokwiiyamba.
Ta indile aanyasha Aanamibia opo ya ye moongaku dhaMathew, ya kale aluhe ya tula oshilongo shawo komitima yo ya yande okupula nkene oshilongo shi na oku ya kwathele moompumbwe dhawo , ihe ya tye oshike ndi na okuningila oshilongo shandje, Mwiya iitya mbika okwe yi popi iikwatelela komupopyo gwomuPresitende omukulukulu gwaAmerica John F Kennedy.

Madela Kapere ngoka a longa naMathew miipambele yaagundjuka okwa li a hokolola Mathew, kutya ka li ike onani yomaudhano ashike okwa li wo thimba yi na ongodhi mewawa lyomapendulepo  lyaanyasha yomOshana.
Natangwe Iithete omupeviminista gwemona naye okwa li wo gumwe ngoka a li a longo omimvo odhindji naMathew miipambele yaagundjuka, nokwa li a pandula aavali yaMathew sho ya li ya pe Mathew eputudho ewaanawa , ta indile wo aakuluntu ayehe koonono opo ya pe aagundjuka omapukululo ge li mondjila ngaashi naana ngoka ga li ga pewa Mathew.
“Mathew okwa li oshipewa oshiwanawa aanyasha yoshilongo shetu nay a kuthe po uuthiga waMathew Omwenyo gwe nag u vululukwe nombili,” Iithete ta ti noluhodhi.

Ongundu onene yaanyasha ya za mOshana ya li ya kwatelwa komeho kungashiingeyi ngoka e li amushangandjayi gwewawa lyaagundjuka moSWAPO Ephraim Nekongo oya li wo mokati kaalilisa omathele mboka ya li ye ya okupa Mathew egumbo lye lyahugunina mpeyaka pOnalukekete.