Ehangano lyoSouthern African Development Community Groundwater Management Institute (SADC-GMI) melongelokumwe nepangelo lyaNamibia otali ka tameka omutumba omutitano gwiilongo yoSADC gun a sha nomeya gokohi yevi.

“Omutumba otagu lalakanene okugandja ompito yokukundathana omikalo moka omeya gokohi yevi taga yamula po eliko nonkalo yaantu pethimbo ndika lyelunduluko lyonkalo yombepo,” Omupopiliko nomutseyinawa mehangano moka Thokozani Dlamini osho a lombwele iikundaneki ngaaka mEtiyali. Shika okwa ti osha simana unene miilongo yoSADC mbyoka ya taalela omashongo ga yooloka noya pumbwa ga kandulwe po nomikalo dhi ili nodhi ili opo ku kandulwe po ompumbwe ndjoka ya taalela omagumbo.  

Dlamini ta ti etumwalaka enene tali ka za momutumba otali ka tulwa momusholondondo gwiikundathanwa komutumba omunene ngoka tagu ka kala koParis muDesemba 2022, osho wo omutumba gwIigwanahangano gwomeya ngoka tagu ka kala koNew York muMaalitsa 2023. 

“Aapopi ya simana  otaya ka popya kombinga yesimano lyomeya ge li kohi yevi, yo taya gandja omatompelo nesimano lyomeya ngoka mokukwathela eyambulepo lyoshitopolwa shaSADC napalwe woo,” ta ti ngaaka. 

SADC-GMI oya totwa po mo2016 nelalakano lyokugandja omatompelo omaananwa kombinga yesimano lyomeya, osho wo okuya po noolaamta dhopaveta.

Omupopiliko muuministeli wuunamapya, omeya netalululo lyevi Jona Musheko okwa koleke kutya omalongekidho ngaka oga tameke nale nepangelo otali yambidhidha oshikondo shika shoSADC. Musheko ta ti open a ompumbwe yokukundathana kombinga yomeya ge li kohi yevi, unene nkene taga vulu okukandula po onkalo yoluhepo.

–Nampa