Kakukutu komatanga okopolifi moNamibia Lieutenant General Sebastian Ndeitunga ota kungulile ovanhu ve na eendjebo dihe na eembapila opo va kale va twala eendjebo davo kopolifi momwedi Septemba.
Okwa ti osha nyika oshiponga okukala ovanhu ve na eendjebo dihe na eembaapila shaashi eshi otashi dulu okukwatifa po omunhu keshe e na ondjebo ndele kai na eembapila.
Pefimbo a ninga eenghundafana naKundana mEtine Ndeitunga okwa popya ta ti okwa didilikwa ovanhu vahapu ve na eendjebo dihe na eembapila, naashi osha eta opo ombelewa yaye i kale ya kunghilila oshiwana opo shi kale sha twala eendjebo kopolifi manga omwedi Septemba inau pwa ko.
Okwa denga omufindo ta ti kukeshe ou ta ka hangika e na ondjebo ihe na eembapila okutameka omwedi tau ya, ota ka pewa ehandukilo lopaveta.
Okwa popya ta ti ovadali nava kale tava holeke nawa eendjebo davo momaumbo shaashi ondjebo oya nyika oshiponga, yoo vali ohai dulu oku eta oinima ihapu ii.
“Ondjebo ohai dulu nokuvakwa po ndele tai ka longifwa oinima ya nyika oumbudi ile okudipaa ovanhu. Onghee nashi kale oshinakuwanifa shomunhu keshe e na ondjebo opo a kale a tula ondjebo yaye metonatelo efimbo keshe,” Ndeitunga ta ti. Ndeitunga okwa ti elalakano lokuyandja eendjebo kopolifi okukelela oilonga yoimbuluma ei tai dulu oku etwa keendjebo ngaashi vati kwa didilikwa ovanhu vamwe hava longo oilonga yoimbuluma neendjebo dihe na eembapila.
“Ngeenge ope na omunhu e wete kutya ita dulu okukala nondjebo yaye, okwa manguluka opo a kale a yandja ondjebo yaye kopolifi opo kukeelelwe elongifo nai leendjebo,” Ndeitunga ta ti.
Okwa ti oshiwana nashi kale sha manguluka okukala tashi longele kumwe nopolifi nokukaleka po ekwatafano liwa mokukondjifa oimbuluma moshilongo.
“Ohandi kunghulile yoo vali ovanhu kombinga yoitopifa ei i li tai dana onghandangala momikunda. Oshiwana inashi pitikwa okukala tashi kwata oitopifa yeeboma shaashi oya nyika oshiponga neenghono,” Ndeitunga ta ti.
Okwa ti ovanhu ngeenge va mona oitopifa nava kale tava lopotele opolifi, oovene vomimukunda ile ookansela vavo opo oitopifa i kale ya kufwa po kovanhu ava ve na eshivo lokulonga loitopifa.
Ndeitunga okwa weda po ta ti ovanhu i nava pumbwa okukala ve na eendjebo ngeenge veli koshi yomalodu shaashi eshi ohashi dulu oku eta oshiponga.